Historia de la llingua asturiana
L’asturianu ye la llingua romance que se fala n’Asturies. Esto ye, trátase d’un idioma procedente del llatín, llingua que llegó al país de mano de los romanos ente l’añu 29 y el 14 a. C.
Nel sieglu V, cola cayida del Imperiu Romanu, el llatín dexó d’evolucionar d’una manera acompasada, provocando la formación de formes dialeutales llocales que foron estremándose de manera progresiva unes d’otres. La creación del Reinu d’Asturies, nel añu 718, favorez la consolidación nel nuesu territoriu de tendencies llingüístiques comunes, que provacaríen la formación de la llingua asturiana.
Actu de l'Academia de la Llingua Asturiana nel 39 Día de les Lletres Asturianes.
Na dómina medieval atópense numberosos documentos notariales, anque non lliterarios. Sicasí, hai evidencies documentales d’actividá lliteraria oral nesti tiempu. La castellanización d’Asturies, tres la xunificación de los reinos de Lleón y Castilla nel 1230, comenzaría tiempu depués, nel sieglu XIV, coincidiendo con un procesu de centralización pola monarquía castellano-lleonesa. Ye importante recordar que, nesti tiempu, nun esiste entovía una conociencia diferencial nidia ente los diferentes dialeutos romances de la Península Ibérica.
Nel sieglu XVII atopamos les primeres muestres lliteraries n’asturianu. Escritores como Antón de Marirreguera, autor del ‘Pleitu entre Oviedo y Mérida: Sobre la posesión de las cenizas de Santa Eulalia’ (1639), el primer poema nel nuesu idioma que llegó a los nuesos tiempos, empiecen a cultivar la llingua asturiana.
Cola Ilustración, nel sieglu XVIII, l’asturianu ye teníu en cuenta polos inteleutuales asturianos. La so cabeza más visible, Gaspar Melchor de Xovellanos, promovió la creación d’una Academia Asturiana de Buenas Letras qu’ellaborara un diccionariu y una gramática, que nun se llegó a facer, y hasta’l 1919 nun llegaría otru intentu normativizador cola Academia Asturiana de Artes Letras, que nun se consolidó.
El franquismu dio pie dende’l 1939 a un procesu de minorización del idioma que provocó una perda de prestixu social del idioma. Coleutivos como Conceyu Bable y la esistencia d’un grupu d’escritores que cultiven l’asturianu lliterariamiente, movimientu conocíu como Surdimientu, provocaron una revitalización del asturianu na década de los 70, que daría un reblagu cola creación nel 1980 de l’Academia de la Llingua Asturiana, autora de la gramática, el diccionariu y les normes ortográfiques vixentes.
- ¿De qué llingua procede l'asturianu?
- ¿Como se forma?
- ¿Por qué nun tuvo diccionariu y gramática hasta’l sieglu XX?
- ¿Qué entidá xugó un papel fundamental na recuperación del asturianu? ¿Qué sabes d’ella?