"Hermanina", el nuevu títulu de Carmen Gómez Ojea

La conocida escritora Carmen Gómez Ojea retoma'l camín de la Lliteratura Infantil n'asturianu pa regalanos l'álbum ilustráu "Hermanina", qu'espubliza conxuntamente coles ilustraciones d'Antònia González Tinturé.

L'autora xixonesa, ganadora de prestixosos premios ente los que rescampla'l Premiu Nadal del añu 1981, inicióse na lliteratura en llingua asturiana cola novela xuvenil El nome de roselina y el llibru de poemes infantiles Cancios pa neños desconsoñaos, dambos de la Editorial Trabe. La so collaboración cola Editorial Pintar-Pintar, responsable d'esti álbum ilustráu, entamó col títulu Arbolín (2009), al que siguiría Sol, nena y pitín (2010) y el presente Hermanina.
Puen consultase, al traviés de la páxina web de la editorial, les primeres páxines d'esti llibru.