García Oliva: “Xosefa de Xovellanos demostró que podía destacar nun mundu de paisanos”

¿Quién yera Xosefa de Xovellanos?

Xosefa de Xovellanos yera la penúltima de nueve hermanos ente los que s’alcontraba’l gran Gaspar Melchor, que-y sacaba un añu. Fue una muyer culta ya intelixente que supo destacar nun mundu de paisanos. Hai que pescanciar que tamos nel Sieglu XVIII onde les muyeres yeren un ceru a la izquierda.

Casóse col Procurador en Cortes por Asturies don Domingo González d’Argandona –d’ehí’l nomatu de “l’Argandona” col que figura nuna cai de Xixón-- y vivió dellos años en Madrid. Ellí frecuentó les más importantes tertulies intelectuales de la dómina, como la del Conde Campumanes, lo cuál yera inusual tratándose d’una muyer.

Enviudó y tornó a la so patria, Asturies, onde tamién tertulió con otros ilustraos asturianos, como González de Posada, Antón Balvidares o Xuan González Villar, toos ellos mui arreyaos a la llingua asturiana. D’ehí principió a escribir poesía n’asturianu.

Tuvo un amor que s’esbayó pola oposición familiar, al ser de menor clas social qu’ella y, muertes les sos tres fíes, sos padres y el so gran amigu Balvidares, más sola que la una, decide metese a monxa. Ellí pasa los caberos años de la so vida hasta la so muerte en 1807. Faltába-y un día pa cumplir los 62 años.

¿Qué supunxo pa les nueses lletres?

Xosefa fue la primer muyer qu’escribió en llingua asturiana. La so obra poética ta compuesta por cinco llargos poemes, nos que se recueye lo que siempre defendió la ilustración: bon gobiernu, educación, trabayu y una cosa que falta muncho na xente d’agora, virtú. Pero too ello con un fondu humanu y social, salpicáu pol so sentíu del humor, mui playu como yera ella.

¿Por qué averar esta figura a la reciella?

Agora que ta reivindicándose la figura de la muyer n’igualdá colos paisanos, ye importante que los rapazos y rapaces conozan a unes muyeres que, a lo llargo de la historia, fueron pioneres nesa llucha pola igualdá. Xosefa de Xovellanos demostró que, pese a ser muyer, podía destacar nun mundu de paisanos.

¿Cómo surdió la idea de dedica-y un llibru?

Dientro d’esi necesariu conocimientu de muyeres que sirvieren como modelos de la llucha pola igualdá, van saliendo biografíes de fémines de munches époques y de munchos países: Hipatia d’Alexandría, Frida Kahlo, Madame Curie, Rosalind Franklin… Pero Asturies tamién tuvo les sos muyeres importantes y queremos dales a conocer. Nesi proyeutu tamos la editorial Pintar-pintar y yo mesmu. Xosefa de Xovellanos ye la primera d’elles.

¿Cómo s’estructura la obra?

Pues como una biografía al usu. Va empobinada pa chavales, pero tamién p’adultos que quieran averase al personaxe, asina que’l rellatu ye de forma cronolóxica dende’l so nacimientu hasta la so muerte. A la fin hai un pequeñu comentariu sobre la poesía de Xosefa y la inclusión d’ún de los poemes. Pa ello respetamos la grafía qu’emplegó l’autora, porque tamién ye un documentu históricu, y pa que se vea, amás, que nun hai nada inventao no qu’escribimos agora. Ye práuticamente igual, cosa que nun puen dicir los siguidores de Cervantes. Ellos sí qu’inventaron.

¿Qué destacaría del llibru?

Sobre too que ye un trabayu d’equipu fechu a trés bandes. Yo fici la parte testual, emplegando un llinguaxe cenciellu y con munchu sentíu del humor. Ilemi Cuesta Mier fizo unes guapísimes ilustraciones que me tienen encantáu, enllenes de detalles de la época, como la ropa, y que son tan importantes o más que’l testu. Y Ester Sánchez fizo una edición preciosa, por dalgo Pintar-Pintar tuvo trés vegaes el Premiu Nacional de Diseñu de llibros. Como digo, un prestosu trabayu a comuña.

Na lliteratura asturiana la importancia de les muyeres ye bien destacada y otru exemplo ye Tuxa, autora a la que se-y dedica esta Selmana de les Lletres.

N’efeutu, la nómina de muyeres que faen lliteratura n’asturianu ye amplísima y de gran calidá. Nun lo digo yo, ye persabío n’Asturies y fuera d’ella. Llamentablemente nun conozo a l’autora a la que-y dediquen esta Selmana de les Lletres, pero de xuro que vendrá a completar perfeutamente esa nómina de la que falamos.

¿Qué proyeutos tien agora en mente?

Tenemos yá preparada, cola editorial Pintar-pintar, la biografía de ‘Urraca l’Asturiana’ que sería’l segundu númberu d’esta posible coleición. A ver si pue editase, ye tamién una muyer interesantísima. Y per otru llau tengo preparáu pa editar un ‘cuentiariu’ con 10 cuentos de fútbol, que se titula ‘Un par de botes’. Tengo muncha ilusión puesta nél, porque recueye munches vivencies de la mio infancia, toes elles al rodiu d’esi deporte. En cualquier casu, ye un llibru p’adultos…, señaldosos.