García Oliva participa nun alcuentru con llectores en Noreña

García Oliva participa nun alcuentru con llectores en Noreña

L’Ayuntamientu de Noreña entama esti xueves un alcuentru del autor Vicente García Oliva colos llectores más mozos de Noreña. La Biblioteca Pública Municipal 'Alonso Marcos de Llanes' va acoyer esta actividá con motivu del Día Internacional de la Llingua Materna.

La cita ta prevista pa les 17 hores y nella l’escritor xixonés va falar de dalgunos de los sos títulos más conocíos ente la reciella, como 'Etenko y los patines maraviosos' o la so creación última 'Páxines del diariu de Simón'. Destináu a neñes y neños d'ente 5 a 9 años, los interesaos han d'apuntase hasta'l miércoles na propia biblioteca n'horariu de 10 a 10.30 y de 17 a 21 hores al tar les places llendaes a 15.

Con esta actividá, el Conceyu de Noreña celebra’l Día Internacional de Llingua Materna, que se conmemoró’l pasáu 21 de febreru. Esta xornada ta impulsada pola Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) pa recordar la importancia de preservar toles llingües al ser éstes un patrimoniu común de la humanidá.