García Oliva inaugura la esposición sobre la so obra fecha por escolinos

Va celebrase esti martes nel Centru de Cultura Antiguu Institutu, llugar onde yá se pue visitar l'amuesa 'Vicente García Oliva: un paisanu con munchu cuentu'.

Los escolinos y escolines de los colexos Asturias, Evaristo Valle, Jacinto Benavente, Manuel García Blanco, Ríu Piles, Santa Olaya y el San Lorenzo son los autores d'esta esposición que pretende repasar la vida y obra d'ún de los sos autores favoritos. Vicente García Oliva ye, amás d'académicu, un escritor de gran trayeutoria y destacáu creador de lliteratura fantástica destinada a xente mozo.

Asina, nel so palmarés ta'l VIII Premiu María Xosefa Canellada, correspondiente al añu 2015, de lliteratura infantil y xuvenil con ‘Fontenebrosa III: el final’, siendo la segunda vegada que consigue ún de los Premios Lliterarios, tres consiguir el XVI Máximo Fuertes Acevedo d'ensayu nel 2010 con 'El síndrome de Sherezade'. Tamién cuenta con un Premiu Timón p’autores n’asturianu y gallego-asturiano, el correspondiente al 2011, qu’entrega l’Asociación Cultural L’Arribada como reconocimientu a toda una carrera lliteraria.

L'escritor xixonés va tar presente na inauguración oficial de l'amuesa, que se va celebrar mañana a les 18 hores na sala 3 del centru municipal, actu nel que ta confirmada la presencia de la conceyala d'Educación y Cultura, Ana Montserrat López Moro, y de la encargada de la Oficina de Normalización Llingüística, María Xosé Rodríguez López. Nel mesmu va facese una visita pola esposición y dellos neños y nees van lleer dalgunos testos de García Oliva.

Hasta'l día 30

'Vicente García Oliva: un paisanu con munchu cuentu' va tar abierta al públicu hasta'l día 30 nel horariu siguiente: de 9 a 21.30 hores, de llunes a vienres; de 10 a 14 y de 16 a 21 hores, los sábados; y de 10 a 14 hores, los domingos. Esta esposición ta entamada pola Oficina de Normalización Llingüística.