Frías Conde revisa'l cuentu clásicu

L'autor Xavier Frías Conde (Béjar, 1965) espubliza cola editorial Asturtoons y dibuxos d'Enrique Carballeira'l llibru "Y foron felices, pero..", historia que revisa'l cuentu clásicu de príncipes y princeses dende una perspectiva crítica.

"Y foron felices, pero.." ye una narración vindicativa y de denuncia centrada na discriminación relixosa que s'espeya nos problemes colos que topa un príncipe al querer casar cola so moza. Conseyeros y sabios reales serán los responsables de poner pilancos a la rellación ente dambos mozos.
Xavier Frías Conde ye profesor de gallegu y portugués na Universidá Nacional d'Educación a Distancia (UNED) y amás de n'asturianu tien escrito y espublizao histories en castellán, catalán, sardu, inglés, portugués o italianu.