Quesos asturianos

11 Payares, 2015
Asturies.com

Ún de los productos fundamentales de la nuesa gastronomía ye’l quesu. Trátase d’un productu que s’ellabora con lleche de vaca, cabra u oveya –n’otros países utilicen otros mamíferos autóctonos– dexándola cuayar y recudiendo-y la bira. Esiste una cantidá importante de variedaes de quesu, que dependen del tipu de lleche que s’utiliza –pueden llegar a amestase– y d’otros aspeutos na so ellaboración, como’l grau de curación o la cantidá de grasa.

Asturies cuenta, pese al so tamañu pequeñu, con cerca de mediu centenar de variedaes, lo que-y permite competir en riqueza –y tamién en calidá– con Francia, considerada tradicionalmente como un paraísu queseru. De fechu, n’Asturies vien utilizándose últimamente un eslogan comercial mui significativu: ‘el país de los 40 quesos’.

«Gamonedo b» de Jrfdiaz - Trabajo propio. Disponible bajo la licencia CC BY-SA 3.0 vía Wikimedia Commons - https://commons.wikimedia.org/wiki/File:Gamonedo_b.JPG#/media/File:Gamonedo_b.JPG

Quesu Gamonéu

¿Sabíes qué…? D’estes variedaes, cuatro cuenten con una Denominación d’Orixe Protexida (DOP), mientres qu’otra tien Indicación Xeográfica Protexida (IXP).

El primer quesu n’obtener la DOP, esto ye, que cuenta con una certificación qu’asegura la so procedencia nun llugar determináu y que la totalidá so producción se fai nesi mesmu entornu, foi’l quesu Cabrales nel 1982. Esta variedá trátase d’un quesu azul que s’ellabora nel conceyu de mesmu nome con un amiestu de tipos de lleche, al igual que’l Gamonéu, que se fai nesa población d’Onís y nel conceyu de Cangues d’Onís, y que tamién cuenta con DOP, nesti casu dende’l 2003. Ésti cuenta con dos variedaes: el Gamonéu del Puertu y el Gamonéu del Valle.

Completen la llista de quesos asturianos con DOP l’Afuega’l Pitu (2003) y el quesu Casín (2006-2011). El primeru fáese con lleche de vaca en trece conceyos del país –Morcín, Riosa, Santu Adrianu, Grau, Salas, Pravia, Tinéu, Miranda, Cuideiru, Candamo, Les Regueres, Muros y Sotu’l Barcu– nes sos cuatro variedaes: atroncáu blancu, atroncáu roxu, trapu blancu y trapu roxu. Pela so parte, el Casín ellabórase en Casu, Sobrescobiu y Piloña, y trátase d’un quesu d’ellaboración prolongada con quesu de cabra.

«Variedaes-afuega» de Denissf - Trabajo propio. Disponible bajo la licencia CC BY-SA 3.0 vía Wikimedia Commons - https://commons.wikimedia.org/wiki/File:Variedaes-afuega.jpg#/media/File:Variedaes-afuega.jpg

Quesu Afuega'l pitu

¿Sabíes qué…? El quesu Cabrales tien una posición destacada ente los meyores quesos del mundu, según los espertos, una catalogación na que nos últimos años ta consiguiendo tamién meter la cabeza’l quesu Gamonéu.

La variedá asturiana que cuenta con una IXP, certificación asemeyada a la DOP pero que nun obliga a que tol procesu d’ellaboración se faiga nesi entornu xeográficu determináu, ye la de quesu Los Beyos. Ésti pue facese con quesu de cabra, vaca u oveya, nunca amestáu, y los llugares onde s’ellabora son Ponga y Amieva, amás de nel conceyu de Sayambre, en territoriu alministráu por Lleón.

El restu de quesos asturianos, pese a nun contar con DOP o IXP, cuenten con una escelente calidá. La llista de variedaes ye llarga, pero de xuru que te suena disfrutar con quesos como de La Peral, Porrúa, Ovín, Pría, Ozcos o Vidiago, ente otros munchos. N’Asturies celébrense munchos certámenes dedicaos a los nuesos quesos. ¡Anímate a dir cola to familia y prueba variedaes que nun conozas!