Mitoloxía asturiana

L’orixe de les tradiciones y seres mitolóxicos asturianos remontase a cientos ya incluso miles d’años atrás. Munchos d’ellos son d’orixe anterior a la llegada de los romanos y d’orixe paganu, esto ye, anteriores al cristianismu. De fechu compartimos munchos mitos cola Europa atlántica, con llugares como Galicia, Bretaña, Irlanda o Escocia, polo que parte de la nuesa mitoloxía puede tener un orixen celta.

 

Vamos facer un pequeñu repasu a los principales personaxes mitolóxicos asturianos:

- Trasgu: Ye un homín con un furacu nuna mano, viste traxe y gorru colloráu y se burlla, tracamundia les coses y engaña a la xente. Ye mui revolvín.

- Xana: Les xanes son seres representaos como una moces de tremenda guapura. Habiten en fontes y tabayones y dicen que guarden ayalgues debaxo les agües. Péinase nes orielles de les fontes o saltos d'agües con peines d'oru, esperando a incautos caballeros pa embruxalos colos sos encantos y promeses de riqueces.

- Nuberu: Llamáu tamién Xuan Cabritu, ye'l ser que guiya les ñubes y les tormentes. Represéntase como un home con barba pertupía, que viste pelleyos de chives y un sombreru d'ala ancha. Pue ser terriblemente dañín coles persones escentellando praos y semaos, si bien pue ser perbeneficiosu colos que lu ayuden.

- Cuélebre: Ye una culiebra xigantesca con ales que curia ayalgues o a les xanes. Tien semeyances a un dragón.

- Busgosu: Ye un ser que vive nes viesques que tien cuernos y pates de cabra, el resto del cuerpu ye d’humanu. Vive nes viesques y encárgase de protexeles.

- El Diañu Burllón: Ye un personaxe que se burlla, qu’engaña a la xente y qu’apaez con figura de persona o d’animal, normalmente como un caballu.

 

Estos nun son los únicos. Hai munchos más seres mitolóxicos como’l Sumiciu, los Espumeros, la Guaxa, la Güestia, el Pataricu, el Pesadiellu etc.