25 de Mayu del 1808

4 Avientu, 2015
Asturies.com

El 25 de mayu ye una fecha clave na historia d’Asturies. Esi día la Xunta Xeneral proclamóse soberana rebelándose contra les tropes franceses de Napoleón qu’invadieren el país, organizando un exércitu asturianu propiu pa enfrentase a él. Inclusive, unviáronse embaxadores a Inglaterra pa solicitar sofitu nesta campaña y ye tamién el momentu nel que se crea la bandera asturiana que ye güei oficial.

Pa entender estos movimientos ye necesario contestualizar el momentu. El Reinu d’España alcontrábase invadíu polos franceses, que pasaren los Pirineos nel 1807 en direición a Portugal ensin resistencia tres la firma del Tratáu de Fontainebleau, nel qu’España y Francia repartíense Portugal, que yera una corona con rellaciones con Inglaterra. Sicasí, Napoleón aprovechó esta situación pa ocupar militarmente’l territoriu y pa poner al so hermanu mayor José Bonaparte como rei tres les abdicaciones de Baiona del 5 mayu del 1808.

Grabáu de J. Cuevas representando'l reclutamientu de tropes nel Campu San Francisco d'Uviéu en 1808.

¿Sabíes qué…? El diseñu de la bandera d’Asturies ye una propuesta de Xovellanos que nació al empar que la declaración de soberanía de la Xunta Xeneral. Yera mui asemeyada a l’actual, cola cruz de la victoria en plata y el lema ‘Asturias xamás vencida’.

Fernando VII yera nesi momentu rei tres el Motín d’Aranjuez acontecíu mes y mediu enantes, que terminó cola dimisión de Manuel Godoy, primer ministru, y l’abdicación de Carlos IV nel so fíu. Estos acontecimientos provocaron los primeros llevantamientos nel norte peninsular y en Madrid, como’l llevantamientu del 2 de mayu, reprimíu poles tropes franceses. Entamaba asina la Guerra d’Independencia.

Nesi contestu, el 25 de mayu la Xunta Xeneral d’Asturies decide declarase soberana y ponse en guerra contra los franceses, formando l’Exércitu Defensivu Asturianu y consiguiendo’l sofitu d’Inglaterra, qu’entregó material de guerra pa lluchar contra les tropes de Napoleón. La intención de la institución yera recuperar el mandu del gobiernu del país y, al empar, la restitución de Fernando VII como rei de la Corona.

Fernando VII

¿Sabíes qué…? El Día d’Asturies ye’l 8 de setiembre, Día de la Santina, una festividá histórica con connotaciones relixoses, pero muncha xente puxó dende la transición por qu’esta celebración tuviera llugar el 25 de mayu en conmemoración a esti fechu históricu.

¿Pero por qué ye tan importante el 25 de mayu? Por tratase del primer actu d’autodeterminación d’Asturies na época contemporánea. Los asturianos dieron nesi momentu el pasu pa ser dueños del so futuru coleutivu, asumiendo la so soberanía. Ye amás el momentu nel que se crea un símbolu que nos identifica como país; la bandera asturiana que tien usu dende esi momentu hasta anguaño.

El restu de la historia ye mui posible que yá la sepas: nel 1813 Fernado VII ‘El Deseáu’ recuperaría la corona tres la firma del Tratado de Valençay, un añu depués de l’aprobación de la Constitución del 1812, conocida como ‘La Pepa’, estraordinariamente importante pol so carauter democráticu. El monarca disolvería les Cortes y abolaría’l testu nel 1814, reinstaurando l’absolutismu y abriendo una época d’inestabilidá.