Escolinos de Llingua Asturiana de L’Entregu preparen postales navidiegues pa les aules hospitalaries

Postales navidiegues cuartu de Primaria Colexu Sagrada Familia

Esti vienres va facese entrega nel HUCA y en Cabueñes les postales navidiegues feches por escolinos de Llingua Asturiana del Colexu Sagrada Familia de L’Entregu. D’esta forma quieren apoyar a les neñes y neños ingresaos nestos hospitales nestes feches tan señalaes.

Vanesa Antolín ye la maestra de l’asignatura cola qu’estos alumnos de Primaria trabayaron la selmana pasada esta actividá n’asturianu. Los de terceru y cuartu fixeron postales destinaes al hospital xixonés, mentes que los de sestu fixéronlo colos del uvieín.

L’oxetivu de la mesma ye “visibilizar la nuesa llingua, el papel de los docentes nes aules hospitalaries y brindar apoyu a los neños nestes feches tan señalaes”, esplica Antolín, que se va encargar de llevar los trabayos de manera personal el vienres a los dos centros. “Feliz Navidá y bon añu nuevu 2021”, ‘Prestoses fiestes navidiegues’, ‘Feliz Nadal’ o ‘Prestoses navidaes y bayurosu añu nuevu’ son dalgunos de les felicitaciones qu’apacen nestes postales xunto con dibuxos de temática navidiega.

Na semeya superior, escolinos de cuartu. Nes dos inferiores, nesti orde, los de sestu y terceru.