El Veranu Lliterariu de Corvera cumple diez años d’alcuentros ente autores y los llectores más mozos

Lluis Aique Iglesias en Veranu Lliterariu

Nel 2012 arrancaba en Corvera la iniciativa Veranu Lliterariu que trayía al conceyu a escritores de lliteratura infantil a Les Vegues pa caltener alcuentros colos sos llectores. Diez años depués esta actividá de promoción a la llectura entamada pola Casa de la Llingua ta más que consolidada.

Xilberto Llano, el llunes pasáu dientro del circuitu Autores nel Camín, y Lluis Aique Iglesias, esta mañana, foron los primeros autores d’esta décima edición de Veranu Lliterariu. Per una hora entrambos charraron nel salón d’actos del Centru Sociocultural de Les Vegues coles neñes y neños presentes nuna esperiencia perguapa tanto pa los creadores como pa los receptores de les sos histories, nesti casu ‘Boliescritu de primavera’ y ‘Lin quier esnalar’, de manera respeutiva

Nel restu d’alcuentros programaos pa estos llunes de xunetu y agostu van participar Berto García, el llunes viniente con ‘Les cuatro estaciones’; María Esther García López, el 25 con ‘Musicalandia’; Nanu González, el 1 d’agostu con ‘Unes vacaciones bien rares’; Xesús González Rato, el 8 con ‘El grúfalu’; Pablo Fraile Dorado, el 22 con ‘Bruxa’; y Daniel García Granda, el 29 con ‘Prau’. Toles cites van principiar a les 11.30 hores y son d’accesu llibre.

Na semeya, Aique esta mañana.