El Ramu
Un ritu que se repite na mayoría de les fiestes populares d’Asturies ye’l ramu. Davezu trátase d’un econtu de forma piramidal con panes, decoráu con fueyes, flores y cintes, que ye la ufierta que se fai al santu o a la virxe na procesión del día de la fiesta.
El ramu ye bendecíu y sal na procesión portáu por vecinos del pueblu. Al final de la mesma entamáse una puya, conocida como ‘puya’l ramu’, y les perres que se lleven son dedicaes a financiar la fiesta.
Ramos nes fiestes del Cristo del Amparo en Nueva (Llanes), setiembre 2015.
La configuración de los ramos varía según el puntu del país, conviviendo formes tradicionales con otres más modernes, anque l’espíritu siempre ye’l mesmu. Ye de destacar que na fastera occidental atopamos ramos más cenciellos que nel centru y l’oriente, zona ésta última onde tienen muncha presencia nes fiestes de los pueblos.
Cuatro persones suelen portalos mientres la folixa, xeneralmente vistíes col traxe’l país. La música nun falta mientres el so treslláu, con toques de panderetes y cantares típicos de cada fiesta interpretaes por muyeres.
Según la tradición, los panes véndense al final de la procesión. Éstos pueden comese o guardase como elementu de proteición pa la casa mientres tol añu, lo que los convierte en deséu de tolos vecinos.
Con formatos más o menos asemeyaose, esti ritu consistente nun ufrienda al santu dase en munches cultures. ¿Conoces dalgunes?
- ¿Qué ye un ramu?
- ¿Pa qué se fai?
- ¿De cuándo vien esta tradición?
- ¿Qué papel xueguen los panes?