El Radar
El so nome orixinal ye ‘Radio detection and ranging’, que tornáu al asturianu significa ‘Deteición y medición de distancies per radio’. ¿Sabes de qué tamos falando? Supongo que non, pero si te digo del radar de xuru que yá te suena más.
El radar ye un aparatu que posibilita que, al traviés de les onde radiollétriques, podamos midir distancies, altitúes, velocidaes…, d’oxetos estáticos o móviles, como automóviles, barcos o aviones. El mou de funcionamientu ye la emisión d’un impulsu de radiofrecuencia qu’unvía’l propiu radar, que mide al traviés del tiempu que tarda tornar una vegada quede reflexáu nel oxetu.
Monitor de radar.
Nos años siguientes dellos espertos investigaron esti campu y pudieron algamar avances nel desendolcu del radar. Sicasí, sería’l so estudiu pa usu militar lo que llevaría al verdaderu desarrollu d’esti inventu na década de los 30, destacando sobre manera’l llabor del británicu Robert Watson-Watt, que nel 1935 demostró con ésitu la deteición d’un avión por un aparatu de radiu.
Nel añu 1939 comenzaba la II Guerra Mundial y nella’l radar sería clave pa los intereses británicos de defender la isla de Gran Bretaña de les tropes alemanes, que tamién taben investigando nesi sen. Pese a la superioridá militar de la Luftwaffe, la fuercia aérea alemana, esta teunoloxía dio una tremenda ventaya a la Royal Air Force, que permitió evitar la invasión d’Alemaña nel branu del 1940, al aumentar la so capacidá de reaición.
Tres la contienda bélica, l’usu del radar vieno aplicándose en dellos campos mui diversos. Quiciabes a ti lo que más te suene ye’l que se fai nes carreteres pa controlar les velocidaes de los coches, pero hai munchos más.
Asina úsase en xeoloxía p’analizar estructures xeolóxiques; na meteoroloxía, pa predecir el comportamientu de fenómenos como tornaos o huracanes; en seguridá de la mariña, pa la detección de barcos illegales… Un inventu, en definitiva, entovía mui útil nos nuesos tiempos.
- ¿Cómo funciona un radar?
- ¿Qué usos conoces que se-y puedan dar?
- ¿En qué época vivió un mayor desarrollu?
- ¿Por qué l’usu militar del radar foi importante?