El proyeutu normalizador ‘Estaciones’ faise realidá

'Estaciones' realidá III Premiu Fierro Botas a la Meyor Idea Normalizadora

Les alumnes y alumnos de cuartu de Secundaria del IES númberu 1 vieron materializáu’l so proyeutu ‘Estaciones’, ganador del III Premiu Fierro Botas a la Meyor Idea Normalizadora qu'entama la Oficina de Normalización Llingüística de Xixón. Consiste en bolses de tela que faen referencia a les estaciones del añu con versos de poetes asturianos.

Lucía Álvarez González, Nerea García Menéndez, Izan Menéndez Morán, Joel Ovies y Carla Peruyero son los responsables de la iniciativa ganadora ente toles presentaes, que “que presenta un planteamientu visual mui atractivo que permite l’averamientu al asturianu y a la poesía escrita n’asturianu, conxugando al traviés de bolses de tela venceyaes a les estaciones del añu, la creatividá lliteraria col léxicu de los campos semánticos del tiempu que pasa, favoreciendo l’usu del asturianu y la so visibilidá al traviés d’una actividá lúdica que conxuga cultura y lliteratura y que ta dirixida a persones de toles edaes y diferentes públicos, sobre manera la xente mozo de Xixón”, espliquen dende la Oficina de Normalización Llingüística de Xixón. La maestra Paz Fonticiella encargóse de coordinala.

La primavera, el branu, la seronda y l’iviernu acompáñese de versos de Lourdes Alvarez García, Milio Rodríguez Cueto, Paulo Antón Marín Estrada y Pablo Texón, qu’agora pasen del papel nel que se presentó ‘Estaciones’ a la tela. Una cuestión qu’ilusionó a los ganadores del gallardón que busca facer alcordanza del xesuita Federico González-Fierro Botas.

El xuráu d’esta edición tuvo presidíu pol conceyal d’Educación y Cultura, Alberto Ferrao, y conformáu por Montserrat Machicado, filóloga especialista en Llingua Asturiana y responsable de la Estaya de la Llingua d’Avilés; María Xosé Rodríguez López, responsable del SNL xixonés; y Jaime González-Fierro Huerta, filólogu y representante de la familia.

Na imaxe, una momentu de la presentación celebrada'l mes pasáu. Semeya propiedá de la Oficina de Normalización Llingüística de Xixón.