El primer Día de la Reciella, nel Muséu del Pueblu d’Asturies

L’asociación “Reciella: families pol asturianu” entama esti domingu 1 de setiembre, nel Muséu del Pueblu d’Asturies, unes xornaes enllenes de talleres y actividaes dirixíes a neños y neñes. L’elementu común a toes elles ye l’usu del asturianu.

El primer Día de la Reciella va cuntar con actividaes empobinaes a neños y neñes d’hasta 12 años. Dende talleres y conciertos hasta puestos de manualidades y llibros n’asturianu, toos tienen de mancomún el usu de la llingua asturiana, un usu que l’asociación Reciella promueve desque se fundara va un añu. El programa d'actividaes va empezar a les 11, con un taller de traxe´l país y cola actividá “Viendo animalinos na Güelga”, una actividá del propiu Muséu, dirixida pol biólogu y miembru de l’asociación Vitor Xuan Meleru. A les 13 hores, Olga Cuervu va cuntar “cuentos pa tola familia”. La tarde va tar acutada a les actividaes musicales a partir de les 16 hores, col taller de baille tradicional “a xugar baillando” y el taller de música que va llevar’l director de los grupos “Seliquín” y darréu “Xentiquina” Nachu Fonseca. El grupu Petit Pop va cerrar el día a les 18 hores col so conciertu “Pop piquiñín”, cantando n’asturianu.

Los xuegos tradicionales y les manualidades tamién van tener presencia, y amás habrá puestos pa mercar llibros de lliteratura infantil y xuvenil n’asturianu, cola guarda d’editoriales asturianes. L'oxetivu ye que los más pequenos avérense, de forma risondera, al asturianu y a la cultura y tradiciones del país.

Más información en www.reciella.com