"El poema que va caure a la mar" inagura la colección en catalán de Pintar-Pintar

Pintar-Pintar inagura col testu d'Aurelio González Ovies ya ilustraciones d'Ester Sánchez "El poema que va caure a la mar" la colección de títulos en llingua catalana de la editorial asturiana.

Como yá anunciáremos nel mes d'agostu del pasáu añu, Pintar-Pintar entama esta nueva aventura editorial con dos de los sos títulos más reconocíos: "El poema que cayó a la mar" d'Aurelio González Ovies y "¿De qué tará fecha la lluna?"de Miguel Rojo, que llegará tamién próximamente a les llibreríes catalanes. Dambos títulos fueron editaos primeramente n'asturianu y, como asegura la propia Ester Sánchez, van valir de preba pa ver como respuende'l mercáu editorial catalán.
Aurelio González Ovies (Gozón, 1964), ye profesor de llatín na Universidá d'Uviéu y tien escritos llibros pal públicu adultu tanto n'asturianu como en castellán. La so incorporación a la lliteratura infantil y xuvenil llega de la mano precisamente de Pintar-Pintar, cola que mantién una estrecha collaboración que s'espeya en títulos como "Chispina", "Too ama", "Cascoxu" o "Mio madre".