El númberu 36 de ‘Lliteratura’ inclúi un especial qu'amuesa'l llabor actual na estaya infantil y xuvenil
L’Academia de la Llingua Asturiana (ALLA) decidió dedicar el númberu 36 de ‘Lliteratura. Revista lliteraria asturiana’, baxo la direición de la escritora Marta Mori, a la lliteratura infantil y xuvenil. Cien de les 173 páxines que componen esta espublización van pa esti especial, completándose colos sos conteníos habituales.
El llector va atopar nesti exemplar poemes d’Aurelio González Ovies, Esther García López, Marisa López Diz y Sidoro Villa; rellatos de Carlos González Espina, Dolfo Camilo Díaz, Enrique Carballeira, Helena Trexu, Iris Díaz Trancho, Mari Luz Pontón, Miguel Solís, Montserrat Garnacho, Nel Morán, Xurde Fernández y Marian García; pieces pequeñes de teatru de Laura Iglesia, Maite González Iglesias y Pablo Rodríguez Medina; y ensayos de Vicente García Oliva y Severino Antuña, ésti últimu sobre’l canon de la lliteratura infantil y xuvenil. Complétase l’especial, que bien podría servir como material de trabayu nes escueles, con reseñes de Mar Martín, Blanca Fernández, Ramón Cueva y Ruth González sobre dalgunes de les obres asoleyaes nesti añu últimu.
La segunda estaya de la revista correspuende a los conteníos clásicos de la mesma, nos que se combinen la creación lliteraria, l’ensayu y la crítica. Abre cola poesía d’Alejandra Sirvent, Armando Vega, Belén Rico y Laura Marcos, pa siguir cola narrativa de Pablo X Suárez, Gonzalo Llamedo, María Fernández Abril y Paquita Suárez Coalla. Darréu atopáse una entrevista de Fernando Cid al direutor y actor asturianu Etelvino Vázquez, y una visión de Vicente García Oliva, con motivu del ventenu quintu cabudañu de la muerte de María Teresa González, de los modelos de muyer na poesía de l’autora.
La penúltima seición ye la dedicada a la traducción, na qu’Inaciu Galán vierte un testu de Quim Monzó y Miguel Sánchez Canella torna tamién dos poemes dende’l catalán. Piesllen esti númberu les reseñes de Marta López Fernández –con un repás xeneral al panorama lliterariu de 2019–, Marcos Martínez Fernández, Diego Solís, José Angel Gayol, Mori y Alba Sánchez Batalla, de dellos títulos.