El Nataliegu

24 Avientu, 2019
Pablo R. Guardado

La nueche del 24 d’avientu celébrase en tol mundu occidental la viéspera de Navidá o Nuechebona. Son munches les tradiciones venceyaes a esta fecha, dalgunes de nidiu calter asturianu, anque munches se repiten n’otros llugares con pequeños cambios cola mesma esencia, como ye’l casu del nataliegu.

¿Pero por qué festexamos esta fecha? En realidá, anque l’orixe pudiera paecer de primer mano cristianu, el raigañu ta nes tradiciones paganes previes: el solsticiu d’iviernu, que marca’l momentu del añu nel que tornen a crecer los díes.

Nataliegu

¿Sabíes qué…? La Navidá celebrase’l día 25, fecha que nun coincidie col solsticiu, que tien llugar, dependiendo l’añu, del 20 al 23 d’avientu.

Col pasu los años, los llugares onde’l cristianismu topó espaciu pasó a festexar el nacimientu de Xesús, anque nun hai certeza de que tuviera llugar nesa fecha, yá que la Biblia nun especifica nin el día nin la estación na María dio a lluz al so fíu en Belén. Sicasí, tomó’l 25 d’avientu, adaptando les creencies previes, al igual que fixo con San Xuan y la Nueche d’Ánimes, pa facilitar la conversión de los paganos.

El nataliegu ye una d’estes tradiciones paganes que se facíen nesta fecha que se caltuvo hasta anguaño y, anque perdió muncha fuercia nes décades últimes hasta llegar casi al escaezu, munches persones tán faciendo por recuperala. Trátase de la quema d’un tueru d’un árbol, les más de les veces de carbayu, qu’ambura tola nueche y que se recueye a la mañana siguiente, día 25.

Ramu Nadal (Wikipedia)

¿Sabíes qué…? Otra tradición asturiana que se ta recuperando pa estes feches ye’l ramu de nadal, una cadarma de madera de forma triangular con 12 veles, una per cada mes del añu, de la que se cuelguen ufriendes.

Los restos recoyíense y guardábense hasta l’añu siguiente, cola intención de qu’esti ritual traxera fertilidá a la casa y al ganáu, y que defendiera a los sos habitantes del mal. Yera, poro, ún de los munchos rituales de Nuechebona, onde la familia se xunta pa cenar, sobre manera carne de gochu na tradición xunto con postres típicos d’estes feches como casadielles o bollines, feches con nuez picao y masa dulce de fariña de trigu, boroña, escanda, compota mazana, el quesu d'almendra, el lleche cuayao o les castañes amagostaes, ente otros.

Anque de tradición asturiana, como dicíemos enantes, el nataliegu o aiciones asemeyaes repítense n’otros puntos d’Europa. Asina hai referencies en zones de Francia, Inglaterra, Cymru, Alemaña, Portugal, Escandinavia o los Balcanes.