‘El grúfalu’, un “referente na lliteratura infantil actual”, yá tien torna al asturianu

Bruño, editorial encargada de les traducciones al asturianu d’Astérix, fai una apuesta nueva pol idioma. Asoleya ‘El grúfalu’, llibru de la escritora inglesa Julia Donaldson que ye “un referente na lliteratura infantil actual”, esplica Xesús González Rato, responsable d’esta torna que cuenta coles ilustraciones orixinales d’Axel Scheffler.

Foi nel 1999 cuando l’autora d’Hampstead, responsable tamién de ‘Room on the Broom (Cómo mola tu escoba, na versión en castellanu)’, asoleyó esta historia orientada a neñes y neños a partir de 3 años. El so ésitu vese reflexáu nos millones d’obres vendíes, les decenes de llingües a los que se traduxo y na continuidá del personaxe, protagonista d’otros llibros y d’hasta una película d’animación 3D de media hora de llargor.

Agora la reciella del país pue disfrutar de ‘El grúfalu’, un “referente na lliteratura infantil actual”, n’asturianu gracies a la iniciativa de Bruño, que tamién la llevó a otres llingües del Estáu como’l catalán. Pa la versión asturiana confió en Xesús González Rato, revisor y correutor de les traducciones d’Astérix, que recibió “con allegría l’encargu, porque yá conocía esti personaxe”.

“La historia va d’un murín que va pela viesca y atopa una raposa, una culiebra y una curuxa que lu quieren comer. Pa evitalo, inventa un personaxe, el grúfalu, y diz-yos que va quedar con él. Pero realmente esistía...”, resume’l traductor. “El grúfalu tien unos caniles terribles, unos deos espurríos y una verruga gafienta a lo cabero la nariz. ¡Por eso tolos animales de la viesca fuxen al velu!”, descríbelu la reseña de llibru.

La versión asoleyada, bien recibida al ser un llibru mui popular, nun tien rima como asocede col orixinal n’inglés. Ésta ye una decisión de la editorial.

Incorporación del asturianu nel menú de la web

La web de Bruño incorpora la entrada ‘Asturiano’ na so web, igualando asina’l nuesu idioma col restu de llingües del Estáu. Calcando nella l’usuariu pue consultar y mercar tolos llibros de la editorial asoleyaos n’asturianu.