El Festival Escenines pa la Reciella programa cuentacuentos, teatru y música pa esta Navidá

El Festival Escenines pa la Reciella programa cuentacuentos, teatru y música pa esta Navidá

Avérase la Navidá y con ella torna, per quintu añu siguíu, el Festival Escenines pa la Reciella. El Colexu Públicu Xovellanos y el Centru de Cultura Antiguu Institutu de Xixón acueyen toles actividades, con espaciu pa los cuentos, el teatru y la música col conciertu de presentación de 'Bestiariu 3'.

‘Reciella. Families pol Asturianu’ entama esta iniciativa que ye un ésitu de públicu y que, nesta ocasión, va celebrase en cuatro xornaes consecutives, del miércoles 27 d’avientu al sábadu 30. Van abrir el festival Martín Peña y Carlos Alba ‘Cellero’ con ‘Contábenmelo en casa’, cuentacuentos pa mayores de 6 años que va representase nel salón d’actos del Antiguu Institutu a les 19 hores.

A la mesma hora y nel mesmu llugar la reciella va poder disfrutar del teatru con ‘De qué color ye’l sol’ (Compañía Kamante Teatro), el xueves 28, y ‘La neña de les trences al revés’ (El Callejón del Gato), el vienres 29. Dambes obres tán destinaes a mayores de 3 años.

Escenines pa la Reciella va pasar al CP Xovellanos na xornada cabera, el sábadu 30, cola celebración del conciertu de presentación del esperáu ‘Bestiariu 3’, discu producíu por La Fabriquina y editáu por Araz.net –empresa tamién editora d’Asturies.com–. L’actu va dar comienzu a les 12 hores y al igual que toles actividaes del festival, tien entrada llibre hasta completar aforu.