El castiellu de Gauzón

El castiellu de Gauzón ye un llugar emblemáticu pa la historia d’Asturies. Asitiáu en La Fundición, nel conceyu de Castrillón, nuna zona anguaño alloñada de la mar, foi la fortaleza más significativa de la monarquía asturiana.

Güei d’ella nun queden más que restos, yá que col pasu los sieglos vecinos de la zona foron aprovechando los materiales pa les sos propies construcciones. Sicasí, na zona fáense escavaciones arqueolóxiques que nun dexen de dar detalles nuevos sobre la edificación, como la esistencia d’un asentamientu anterior a la so construcción.

LMLM, CC BY-SA 4.0 <https://creativecommons.org/licenses/by-sa/4.0>, via Wikimedia Commons
Peñon de Raíces onde s'asitia'l castiellu.
¿Sabíes qué…? El castiellu de Gauzón nel pasáu taba bañáu pola mar en marea alta y sirvió como defensa ente les incursiones viquingues na costa asturiana.

Llevantóse sobre un peñón de 38 metros d’altor nuna fecha desconocida. Anque nun primer momentu asitiábase nel sieglu IX poles informaciones apaecíes nes cróniques, la prueba del carbono-14 adelanta les primeres construcciones al VI y VII, con un desendolcu mayor según los investigadores a partir del VIII.

Ente les infraestructures coles que contaba taba un espaciu metalúrxicu y taller d’orfebrería onde se fabricaben armes y ferramientes. Tamién xoyes, como ye’l casu de la Cruz de la Victoria, reliquia de madera de carbayu revistida d’oro y piedres precioses ellaborada nel llugar nel reináu d’Alfonso III que, según diz la lleenda, llevó Pelayo, primer monarca asturianu, na batalla de Cuadonga.

Denis Soria, CC BY-SA 4.0 <https://creativecommons.org/licenses/by-sa/4.0>, via Wikimedia Commons
El castiellu anguaño.
¿Sabíes qué…? El nome del castiellu de Gauzón apaez nel reversu de la Cruz de la Victoria, que se guarda na Cámara Santa de la catedral d’Uviéu.

Col pasu de los años el llugar sirvió de residencia del representante real o conde. Ente ellos tuvo Gonzalo Peláez, noble asturianu que protagonizó delles rebeliones contra’l rei Alfonso VII de Lleón de magar el 1132, abellugándose nel propiu castiellu de Gauzón.

Cola donación de la construcción por parte del rei Alfonso IX de Lleón a la Orde de Santiago entama la decadencia del llugar, con una perda de poder políticu y militar, y deterioru estructural. Yá nel sieglu XV l’edificiu taba abandonáu entamando un escaezu que se recuperó’l sieglu pasáu col interés nel so estudiu y, sobre manera, coles escavaciones arqueolóxiques entamaes dende’l 2007.

  • ¿Por qué ye importante’l castiellu de Gauzón?
  • ¿Qué carauterístiques tenía la zona onde se llevantó?
  • ¿Ónde se guarda agora la Cruz de la Victoria y por qué sabemos que se fixo nel castiellu de Gauzón?
  • ¿Quién ye Gonzalo Peláez?

 

Enllaza estos castiellos en diferentes époques, dalgunos yá desapaecíos, col conceyu al que pertenecen:

Soberrón
 
Gauzón
 
La Peñe l’Alba
 
El Picu Ḥana
 
Tudela
 
Curiel
 
Llanes
Castrillón
Cabrales
El Valle Baḥu de Peñamellera
Uviéu
Xixón

 

Semeyes: