“Cuando salimos, l’asturianu sal con nós”, lletra del cantar de Xaime Martínez pal VIII Día de la Reciella

El 2 d’ochobre, de sábadu, vuelve’l Día de la Reciella. El Muséu del Pueblu d’Asturies, llueu d’un añu de parón obligáu, torna a acoyer esta xornada de celebración familiar n’asturianu dafechu, qu’esti añu va tener como banda sonora’l cantar ‘L’asturianu sal con nós’, con lletra de Xaime Martínez y Estela Álvarez Blanco.

“Agora tu, al salir de casa / pon fociquera / y llama to güela / pa glayar xuntes / esta canción: / cuando salimos, l'asturianu sal con nós”, diz l’estribillu de la canción qu’interpreta’l tamién poeta xunto cola so banda, La Familia Tradicional. Ye la primer vez que’l tema promocional del Día de la Reciella nun lu compón David Guardado, lletrista de ‘Entaína’, musicáu por Skama la Rede; de ‘N’asturianu sumes’, por David Varela; de ‘¡Espoxiga!’, por Pop Piquiñín; y de ‘¡Préstame pola vida!’, pol dúu Muga, que formen Alicia Varela y el propiu Guardado, y el Corín de Reciella nos años previos pa esta folixa qu'entama 'Reciella. Families pol Asturianu'.

Cuatro cantares que yá son auténticos himnos pa les neñes y neños asturianos al que se suma agora ‘L’asturianu sal con nós’. Ésta ye la lletra completa d’esti cantar yá disponible nes principales plataformes dixitales, que bien pronto va contar tamién con videoclip:

Cuando llueve y ye de nueche
salen a andar
les sacaveres,
mentes la flor
del baobab
xorrez cada cincuenta años o más.

Cuando ta la lluna encesa
sal l'home llobu
por una presa,
y a la fin d'añu,
llueu de cenar,
el corchu sal de la botella de xampán.

Agora tu, al salir de casa,
pon fociquera
y llama to güela
pa glayar xuntes
esta canción:
cuando salimos, l'asturianu sal con nós.

Cuando'l sol apreta fuerte
al neñu roxu
sálen-y penques,
y a la qu'entama
a dexelar
la osa sal de la so cueva d'ivernar.

Cuando ye la nueche escura
sal un vampiru
que ye mui finu,
y como nun
se quier manchar
a la so víctima nun ye a taragañar.

Agora tu, al salir de casa,
pon fociquera
y llama to güela
pa glayar xuntes
esta canción:
cuando salimos, l'asturianu sal con nós.