Cuadonga

De xuru que nin una nin dos nin tres, sinón en munches ocasiones, visitasti Cuadonga. D’ehí sabes qu’hai una basílica y una cueva onde ta la Santina, la Virxe de Cuadonga, amás del comienzu de la xuba a los Llagos, y venceyarásla a Pelayo, pero Cuadonga nun ye un llugar especial dende la época de primer monarca del Reinu d’Asturies, sinón que tien historia dende muncho más atrás.

Nel sieglu XII apaecen los primeros testimonios qu'acreíten la esistencia d'un sitiu de cultu en Cuadonga, nome que los espertos consideren que vienen de Cova d'onnica col significáu de ‘cueva de la fonte’ al llevar términu célticu ‘onnika’ (‘onna’ sería ríu). Nesi sen, los celtes facíen cultu al agua, polo qu’esta cueva, baxo’l que surde’l ríu Deva, yera venerada dende muncho más atrás.

La Cueva.

¿Sabíes qué…? Deva ye’l nome d’una diosa celta venceyada al agua. Por esti motivu’l so nome se repite pa denominar ríos n’Asturies y n’otros llugares de tradición celta, como Galicia o Cantabria.

Cuadonga dende la Cruz de Priena.

¿Sabíes qué…? Les lleendes populares de la zona sobre la batalla de Cuadonga falen de qu’una troncada provocó la victoria cristiana: los homes de Pelayo engañaron a los musulmantes y soltaron troncos y piedres que cayeron sobre ellos per una lladera

Poco conocemos de cuando comenzó’l cultu a la Virxe de Cuadonga. La primer construcción nel llugar fíxose en tiempos d’Alfonso I, monarca que se casó con una fía de Pelayo, en concreto una capiella. Sieglos depués, nel 1777, el complexu qu’evolucionó nel llugar sufrió una quema casual nel que se perdió la imaxe de la virxe.

L’actual ye del 1798 y se caltién na cueva, que vivió munches modificaciones nesti tiempu hasta caltener l’estáu actual. Na redolada tamién se llevantó una basílica, finada nel 1901, y dellos edificios, convirtiendo’l llugar nun espaciu de llegada de miles de visitantes tolos años.