Carballeira, Frías Conde y Fernández editen trés histories con AsturtOOns
La editorial AsturtOOns cuenta con trés novedaes nesti añu 2014. Trátense de trés prestoses histories pa neños y neñes firmaes por Enrique Carballeira, Xavier Frías Conde y Jorge Fernández con ilustraciones del primeru.
El periodista piloñés presenta ‘Una mascota pa Carola’, llibru que cuenta la historia d’un dragón que tien la mala suerte de cayer nes manes de Carola, una princesa caprichosa. Mentes, Frías Conde ye l’autor de ‘El misteriu de les histories que s’escribíen soles’, que fala d’un rapaz un poco vagu, Alberto, al que nun-y presta facer les redaiciones y cuentos que-y pide la so maestra. Un día, per arte de maxa y pa la so sorpresa, éstes principien a escribise soles.
Completen les espublizaciones d’AsturtOOns nel primer semestre del añu ‘El misteriu del Vassilius Destounis', de Jorge Fernández, una historia d’intriga que trata d’un barcu al debalu, ensin tripulación, y d’un neñu y el so güelu qu’investiguen esi misteriu.