Skip to content

Nueves tecnoloxíes

19-08-2009

Softastur acaba d'espublizar la traducción a llingua asturiana d'Akregator, dientro del so proyeutu de software llibre. Akregator ye un amestador de noticies llibre, compatible con feeds (suministru de datos) en formatu RSS y Atom, que permite tar al día de los cambeos nos blogs a los que l'usuariu tea soscritu. Too ello cola interface en llingua asturiana.

07-08-2009

Asturies foi'l llugar escoyíu por Google pa presentar nel estáu "Google Transit", una nueva ferramienta de planificación de rutes en tresporte públicu. El nuesu país ye'l primeru nel Estáu n'incorporase a esti proyectu. Transit permite a una persona conocer la oferta de tresporte públicu pa dir d'un orixe a un destín, con horarios, recorríos y empreses qu'ufierten el serviciu.

18-06-2009

Softastur asoleyará esti vienres la versión de software educativu y n'asturianu d'Edubuntu, dirixida al ensiñu de neños ente 3 y 18 años. Softastur organizará xunto con profesores docentes clases pa neños d'ente estes edaes en Llangréu, el vienres día 19 a les 17:00 nel cibercentru de les Escueles Dorado de Sama. Les clases tendrán como llingua vehicular l'asturianu.

11-06-2009

La controvertida llei "Internet y creación", conocida tamién como "Llei antipiratería", que tenía como oxetivu "lluchar contra les descargues illegales" y afitaba la posibilidá de desconexón a la rede a los usuarios que descargasen illegalmente conteníos con copyright, fue valtada en bona parte del so conteníu pol Conseyu Constitucional francés, qu'afita nel so dictame qu'esta llei "vulnera la presunción d'inocencia y cuestiona'l derechu a la información".

18-05-2009

El candidatu d’UNA a les europees Daniel Fernández afirma que la propuesta Zapatero de da-y un ordenador al alumnáu pue ser un brindis al sol sinon cuenta cola implicación del profesoráu ya  infraestructures afayadices.Asimesmo pidió-y al Conseyeru d’Educación d’Asturies, José Luis Iglesias Riopedre, qu’esplique “cómo se va a xestionar la midida de Zapatero d’apurri-y un portátil a cada alumno de quintu de primaria n’Asturies” desque la so Conseyería tien competencies

15-05-2009

L'Antiguu Institutu de Xixón va acoyer un taller d'instalación d'un sistema operativu n'asturianu'l próximu sábadu 16 de mayu n'horariu de 10.00 a 14.00 y 16.00 a 21.00 hores col enfotu "d'enseñar y/o instalar a tolos/es interesaos/es un sistema operativu que-yos permita manexar un ordenador n'asturianu dafechu".

13-05-2009

L'Asamblea de la República francesa dio ayer el preste a la controvertida llei "Internet y creación", conocida tamién como "Llei antipiratería". Esta llei tien como oxetivu "lluchar conrtra les descargues illegales" y conseña la posibilidá de desconexón a la rede durante un periodu de trés meses a un añu a los usuarios que descarguen illegalmente conteníos suxetos a derechos d'autor. 

12-05-2009

TeleCable decidió aumentar la velocidá de conexón d'Internet "en tola so gama de servicios de baldre, asitiando la conexón superior a Internet nos 30 megabits per segundu, un 50 por cientu perriba de lo qu'ufre anguaño esti tipu de serviciu, de 20 megues", según afita la empresa asturiana, añadiendo que "tolos sos clientes verán aumentáu'l so anchu de banda ensin xuba de tarifes".

12-05-2009

Ensin retrasu sobre l'horariu previstu, la misión de la Nasa STS-125 Atlantis, despegó de Cabu Kennedy con destín al telescopiu espacial Hubble. Ye la cuarta y última vegada que se va remocicar l'observatoriu robóticu y el vuelu, arrodiáu d'espectación, tien una complexidá que lu faen un fechu hestóricu pa la astronáutica.
 

21-04-2009

Los investigadores del Observatoriu Européu Austral, ESO, tán acabantes d'anunciar nuna rueda de prensa cellabrada esta mañana el descubrimientu d'un planeta asemeyáu al nuestru. De fechu, sigún los datos, esti ye'l exoplaneta más pequeñu atopáu hasta la fecha.
 

18-04-2009
Na edición pasada de los Premios Andrés Solar el Pegollu llevolu  la comunidá de traductores de software llibre Softastur. En tv.asturies.com ufiertamos una entrevista colos miembros d'esta comunidá Iñigo Varela y Mikel González, onde nos espliquen les característiques d'esti proyectu.
18-03-2009

Detectóse agua líquido salao nuna de les pates de la sonda espacial Phoenix de la NASA . Esta ye la primer vez na hestoria qu'agua n'estáu líquido ye detectada y retratada fuera de la Tierra. Sigún ún de los investigadores principales de la misión, Nilton Renno, "un númberu garnde d'evidencies físiques y termodinámiques falen de que la presencia d'agua salao ye un fechu común en Marte".
 
 
 

16-03-2009

La misión STS-119 Discovery fixo un despegue espectacular a les 00:43 (GMT) de güei. L'orbitador de la NASA va camín de la Estación Espacial col enfotu d'instala-y un xuegu de paneles solares, que sumáu a los que yá tán furrulando nel complexu, va incrementar la enerxía llétrico disponible y permitir espediciones más numberoses. Si esta misión termina con ésitu 6 astronautes, en cuenta de 3, van poder residir de forma permanente na ISS.

12-03-2009

La Espedición 18 de la Estación Espacial Internacional tuvo qu'abellugase más de 10 minutos dientro de la nave Soyuz énte'l peligru de choque col restu d'un satélite vieyu convertíu en chatarra espacial. Les midíes de precaución tomáronse namás llevantase los astronautes al entrar dientro del rangu de lo posible'l riesgu de colisión.

07-03-2009

El cohete Delta-2 arrellumó'l cielu de Cabu Cañaveral llevando a recostines l'observatoriu espacial Kepler na so misión de guetar planetes estrasolares terrestres. El telescopiu de l'axencia norteamericana del espaciu, NASA, va ser puxáu pol llanzaor Delta hasta una órbita solar dende la que les vistes van ser más afayadices pa llograr el so cometíu.

06-03-2009

Softastur va traducir "Edubuntu", una distribución del Sistema Operativu GNU-Linux empobinada a escolinos de 6 a 18 años y desendolcada internacionalmente por reconocíos educadores y tecnólogos. Softastur, coleutivu ensin ánimu de lucru formáu por programadores, alministradores de sistemes, profesores y traductores n'asturianu, dio anuncia tamién de que ta acabante de traducir el 100% de la suite oficial del sistema operativu Ubuntu.

19-02-2009

Unos 20.000 asturianos van quedar sin ver la televisión n'abril del 2010 cuando se produza'l llamáu apagón analóxicu, según informó güei n'Uviéu'l director de desarrollu de negociu de SES-Astra, Miguel Pingarrón, que presentó les conclusiones d'un estudiu sobre la Televisión Dixital Terrestre (TDT) n'Asturies.
 

16-02-2009

El Plan Estensión de la Rede de Telefonía Móvil del Ministeriu d'Industria, Turismu y Comerciu desarrolláu ente'l 2005 y el 2008, algamó n'Asturies 387 núcleos de población, toos rurales, con 36.359 beneficiarios, segúnfizo públicu'l Ministeriu.
 

07-02-2009

Asturies.com abrió esta selmana a los sos usuarios la posibilidá de rexistrase nel mediu. Los usuarios rexistraos van dir teniendo accesu a delles posibilidaes d'interaición y participación, ente elles la posibilidá de comentar les noticies y amestar comentarios en Conceyu Abiertu.
 

20-01-2009

Dempués de dellos meses de trabayu presentamos a los nuesos llectores una nueva versión d'Asturies.com, o meyor dicho, la primer fase de lo que va ser la nueva Asturies.com, un mediu históricu na rede asturiana pero que precisaba un cambéu radical p’adaptase tanto a les nueves posibilidaes de la rede como a les espectatives de los nuesos usuarios.