Suárez va representar a Wikipedia n'asturianu en Donostia

|
Víctor Suárez

L'usuariu Víctor Suárez Piñero, alministrador y divulgador del proyeutu d'enciclopedia llibre n'Asturies, va ser l'encargáu de representar a la llingua asturiana nun alcuentru que se celebra'l sábadu en Donostia. Ta enmarcáu na capitalidá europea de la Cultura y entámalu la comunidá de Wikipedia n'eusquera.

L'actividá xira alredor d'un esposición que lleva'l nome de '1516-2016. Bake-itunak' (1516-2016. Trataos de paz), con sede repartida ente'l San Telmo Museoa y Koldo Mitxelena Kulturunea de la capital gipuzkoana, qu'acueye más de 400 obres d'artistes como Goya, Rubens, Murillo, Zurbarán, Ribera, Picasso o Le Corbusier que pertenecen a 21 instituciones museístiques. La razón de la muestra ye la celebración que vive Donostia nesti 2016, Capital Europea de la Cultura xunto cola polaca Wrocław.

Suárez va participar nesti alcuentru de wikipedistes tornando al asturianu los artículos correspondientes a diches obres. El programa, que va desendolcase na plaza Zuloaga, inclúi amás una rueda de prensa, una visita guiada y delles presentaciones de proyeutos GLAM per parte de Wikipedia n'eusquera, Amical (comunidá d'usuarios de Cataluña), Wikimedia Francia y Wikimedia España, qu'espondrá'l proyeutu realizáu colos museos estatales la seronda pasada (GLAMing Madrid).

Contador Estadistiques