Los ministros d'Economía de la eurozona aseguren que nun van dexar que pieslle nengún bancu

Los ministros d'Economía de la eurozona aseguraron güei que nun van permitir que resquiebre nengún bancu de la Unión Europea por mor de les actuales dificultaes y que cada Estáu miembru va adoptar les midíes necesaries pa salvar a les instituciones financieres de dificultaes. "Tamos d'acuerdu en que nenguna institución financiera sistemáica tien de frayar. Toos tamos comprometíos na vía del salvamentu de los bancos y de les aseguradores", dixo'l primer ministru luxemburgúes y presidente del Eurogrupu, Jean-Claude Juncker, al acabar el conceyu. "Tien de facese tolo necesario y va facese tolo necesario pa que les instituciones financieres sitemátiques nun resquiebren. Los Estaos van ser garantes de qu'esto nun se produza", insistió Juncker, qu'aseguró que tolos países del Eurogrupu tán d'acuerdu coles conclusiones aprobaes polos países europeos del G-8 nel conceyu celebráu esti sábadu en París. Los países que comparten la moneda única acordaron amás una serie de principios comunes que deben guiar el salvamentu públicu de bancos. Esti tipu d'intervenciones "tienen de producise a tiempu" y nunca tienen de tener como oxetivu principal "sovencionar a los aicionistes". Cualquier actuación tien de "llendase nel tiempu", y los Estaos qu'intervengan van tener tola llexitimidá pa despidir a los directivos de los bancos y llendar les sos ganancies. Toles operaciones de salvamentu deberán evitar cualquier "desequilibriu tresfronterizu". "Trátase d'un enfoque que necesariamente va ser nacional porque los medios son nacionales pero que debe llevase nun marcu solidiariu", européu, dixo Juncker. Al entruga-y sobre si la UE pue tomar más midíes dao qu'esti enfoque nacional hasta agora nun tranquilizó a los mercaos, Juncker señaló que "hai una diferencia ente la evolución de les bolses y la salú de los bancos" y mostróse convencíu de qu'a llargu plazu l'actuación de los Ventisiete va llograr recuperar la confianza de los mercaos y la estabilidá del sistema financieru. Per otru llau, el presidente del Eurogrupu aseguró qu'en nengún casu va "debilitase" el Pactu d'Estabilidá y Crecimientu (PEC), que llenda'l déficit públicu a un máximu del 3%, pa facer frente a l'actual crisis, sinón que va aplicase la flexibilidá que yá ta prevista dende la reforma del 2005. "El pactu va respetase en toles sos partes, tanto no que se refier a la so lletra como al so espíritu, nun va haber cambios nes regles nin na so interpretación", dixo Juncker.