La Fiscalía abre "dilixencies d'investigación" pola denuncia d'Asciz escontra l'alcalde d'Uviéu pola 'Yeguada de Picos'

|

La Fiscalía del Tribunal Superior de Xusticia d'Asturies (TSXA) abrió "dilixencies d'investigación" pola denuncia presentada pola Asamblea de Ciudadanos pola Izquierda (Asciz) sobre la rellación del alcalde d'Uviéu, Gabino de Lorenzo, cola 'Yeguada Picos d'Europa'. Asciz unvió, según informó nuna nota prensa, al Ministeriu Fiscal un escritu nel que facía constar la sospecha de "tapadura deliberada" per parte del primer edil de bienes de la so propiedá que podíen ser constitutivos de delitu. Concretamente referíase a la 'Yeguada Picos d'Europa', que nun foi declarada per parte del rexidor uvieín na declaración de bienes patrimoniales que presentaron los miembros de la Corporación hai unos meses. Nel so escritu presentáu ante la Fiscalíla, Asciz informó de que la sociedá Yeguada Picos d'Europa figuraba dende la so constitución en 1998 na cai Conde Toreno onde tien la so casa l'alcalde y dende mayu del 2008 na cai Juan Bota Roldán, que consta como la residencia de l'alministradora única de la sociedá y nuera del alcalde, María Rosa Virgós Álvarez. De primeres, los socios fundadores de la sociedá fueron l'alcalde, la so esposa y los sos dos fíos pa dempués dexar posteriormente a éstos últimos y a la so nuera como alministradores únicos. L'alcalde alegó que nun tien participaciones na sociedá pues nun consta como sociu de la mesma polo que nun incluyó la empresa na declaración de bienes. La citada yeguada, según consta na so páxina web, cuenta con más de 190 cabeces de ganáu equín y nel añu 2005 facturó 631.927 euros en ventes de caballos. Los beneficios de les mesmes incrementáronse nesi añu en 14,47 por cientu, según consta na denuncia d'Asciz na que s'incorporen más datos de la sociedá. La formación entiende poro que los fechos puen ser constitutivos d'un "delitu de falsedá de documentu públicu y d'un delitu escontra la Facienda Pública". REAICIONES El voceru municipal d'Asciz, Roberto Sánchez Ramos, destacó en declaraciones a Europa Press la importancia de que la fiscalía abra dilixencies porque supón "investigar al alcalde d'Uviéu per primer vez en 18 años". De la mesma manera, solicitó la collaboración ciudadana cola fiscalía pa l'aportación de pruebes. Los conceyales del Grupu Socialista, Paloma Sainz y Alfredo Carreño, ficieron públicu un comunicáu nel qu'aseguraron que l'alcalde sigue teniendo la oportunidá de dar esplicaciones nel plenu municipal sobre la so participación na sociedá 'Yeguada Picos d'Europa'. Los socialistes insistieron en que de magar les esplicaciones del alcalde nel Plenu y la "documentación nel so poder" van decidir "les acusaciones que consideren oportunes". Recordaron que l'alcalde tuvo ausente nos dos últimos plenos municipales nos que'l grupu socialista quería plantega-y delles entrugues sobre la 'Yeguada'. Amás, señalaron que la 'Yeguada Picos d'Europa SL' tien al so nome 49 finques nel conceyu d'Onís que sumen una superficie de casi 30 hectárees. Según los socialistes, casi la metá d'eses 30 hectárees s'inscribieron ente 1998 y 1999 en menos de dos años dende la constitución d'una sociedá fundada por De Lorenzo y la so esposa y los sos dos fíos como socios únicos el 21 d'abril de 1998. El restu del terrenu s'inscribió ente'l 2005 y 2007. Pela so parte, el PP calificó de "bufonada l'escándalu qu'Asciz y el PSOE traten de provocar ante la decisión de la Fiscalía d'estudiar la denuncia presentada escontra l'alcalde, Gabino de Lorenzo", en rellación a la so participación na 'Yeguada de Picos d'Europa'. Recordaron qu'ésti ye'l mesmu trámite que s'efeutuó "nes más de sesenta denuncies acumulaes polos grupos municipales de la oposición a lo llargo de 17 años escontra miembros del equipu de Gobiernu del PP qu'en tolos casos demostráronse falses tres el so estudiu per parte de la Fiscalía". Entiende que la fiscalía "ta cumpliendo cola so obligación, al abrir una investigación". "Lo que presenten como un escándalu nun ye más que'l trámite ordinariu reguláu na llei de l'aición qu'ellos mesmos provocaron cola so denuncia", añade'l comunicáu. COSPEDAL TAMBIÉN RESPUENDE Pela so parte, la secretaria xeneral del PP, María Dolores Cospedal defendió güei la presunción d'inocencia del alcalde d'Uviéu, y sorrayó que l'aición de la Xusticia "tien de ser igual pa tolos españoles". Al entrugala por esti asuntu y polos últimos casos de supuesta corrupción conocíos en Baleares y Canaries, asina como si son compatibles col Códigu d'Ética del PP, De Cospedal recordó la presunción d'inocencia de cualquier español.

Contador Estadistiques