noticia

L'Asociación d'Escritores d'Asturies entregó esti xueves ocho d'ochobre nel Centru de Cultura Caxastur d'Uviéu los sos premios de la Crítica a les meyores obres del pasáu añu 2008. Nesta décima edición de los galardonaos na modalidá de Lliteratura Infantil y Xuvenil fueron Berta Piñán por "Les coses que-y presten a Fran" como meyor llibru n'asturianu y Miguel Rojo por "El viaje de Tin y Ton" como meyor llibru en castellán. Dicir qu'esti últimu tien una edición billingüe polo que tamién ye posible disfrutar d'él en llingua asturiana.

El próximu xueves día 1 d'ochobre, y dientro de les actividaes de L'Arribada Vagamar Lliteraria, van presentase nel Muséu del Ferrocarril de Xixón les últimes novedaes de Lliteratura Infantil escrites en fala eo-naviega.

La editorial asturiana Pintar-Pintar ta acabante d'asoleyar el llibru Arroz, agua y maíz, obra ganadora del Premiu "MªXosefa Canellada" de Lliteratura Infantil y Xuvenil que convocara la Conseyería de Cultura y Turismu d'Asturies per primer vez el pasáu añu. La escritora Berta Piñán ye l'autora d'un testu que fue especialmente valoráu pol xuráu del premiu pola so orixinalidá y el tratamientu de temes universales venceyaos al ámbitu de lo social.

Ta acabante de publicase la tercer edición de "La Hestoria d'Avilés" del escritor Miguel Solís Santos, editada por Careaga Digital. Esta obra relata la hestoria avilesina illustrada al traviés de 226 viñetes, distribuyíes en 52 páxines, dende’l Paleolíticu a la construición del Centru Niemeyer (2009). Esta tercer edición de 2009 añade cinco nueves páxines con venticinco viñetes inédites, que recueyen los aconteceres más importantes dende 1992 al presente.

La colección “escolín” de lliteratura infantil y xuvenil qu’espubliza l’Academia de la Llingua Asturiana, llega al so númberu 64 cola historia “Toya yá ye grande” del escritor y maestru de llingua asturiana Xulio Berros y les ilustraciones d’Enrique Carballeira.

Con motivu de los actos de celebración del bicentenariu del nacimientu de Louis Braille, inventor del métodu de llectura en relieve que-y permitió l'accesu a la llecto escritura a millones de ciegos en tol mundu; la ONCE acaba de facer pública la so torna del llibru "La bruxa Pumarina y el dragón Maragatu" a dichu llinguaxe.

La conocida escritora asturiana Carmen Gómez Ojea acaba asoleyar un nuevu álbum ilustráu n'asturianu baxo'l títulu "Arbolín". El cuentu ye una historia d’amistá ente una neña, Queti, y un árbol, Arbolín, que s'alcuentren nun parque.
Queti camienta que l'árbol pue ser una fada de pelo verde, convertida por un bruxu n’árbol, pese a qu'a lo último, descubrirá la verdá. 
Al textu de Carmen Gómez Ojea, editáu por Pintar-Pintar en castellán y asturianu, acompáñenlu les ilustraciones de Blanca Prendes.

El Centru de Profesores y Recursos d'Avilés acaba facer públicu'l programa de la "Primer Sestaferia del Profesoráu de Llingua Asturiana", una actividá que xirará al rodiu del desarrollu curricular y didácticu de l'asignatura, y que tendrá llugar los díes 5 y 6 de xunu.

La Editorial Ámbitu acaba facer pública, con motivu de los actos de la XXX Selmana de les Lletres Asturianes, la espublización d'una colección de llibros empobinaos a los neños del primer ciclu de la Educación Infantil (0-3 años).
La presentación tuvo llugar esti martes, a les 19.00 hores, na FNAC de Parque Principáu, y nella participaron Sabel Tuñón, Lourdes Álvarez y Enrique Carballeira; coautores ya ilustrador respectivamente de la serie formada por títulos como "Animalaes", "Los animales", "Animalinos" y "La Primavera".