Xulio Berros recupera'l personaxe de Toya

La colección “escolín” de lliteratura infantil y xuvenil qu’espubliza l’Academia de la Llingua Asturiana, llega al so númberu 64 cola historia “Toya yá ye grande” del escritor y maestru de llingua asturiana Xulio Berros y les ilustraciones d’Enrique Carballeira.
El llibru, escritu nun llinguaxe qu’amiesta la riqueza léxica cola adaptación formal al públicu al que va empobináu, recupera un personaxe clásicu nes obres de l’autor, y que yá conocieramos pente medies de los llibros “Toya” y “El mundu de Toya”. Nesti casu Toya, que s’alcuentra nel tercer cursu de primaria, presentanos a les persones y les coses que formen parte de la so vida al tiempu qu’afonda en sentimientos como l’amistá, la solidaridá o la tristura pola muerte d’una persona querida.
 
Na revista dixital "A la gueta los suaños" tuvimos oportunidá d'entrevistar al autor Xulio Berros a propósitu del llibru.