Edítase "Arroz, agua y maíz" obra ganadora del I Premiu "MªXosefa Canellada"

La editorial asturiana Pintar-Pintar ta acabante d'asoleyar el llibru Arroz, agua y maíz, obra ganadora del Premiu "MªXosefa Canellada" de Lliteratura Infantil y Xuvenil que convocara la Conseyería de Cultura y Turismu d'Asturies per primer vez el pasáu añu. La escritora Berta Piñán ye l'autora d'un testu que fue especialmente valoráu pol xuráu del premiu pola so orixinalidá y el tratamientu de temes universales venceyaos al ámbitu de lo social.
El llibru, que toma forma coles ilustraciones d'Elena Fernández, afilvana nos diferentes poemes un paséu pela vida de neños y neñes de diferentes partes del mundu. Asina topámonos cola historia d'Alex, un neñu ucranianu de nueve años, o Kim un neñu indú de Bangladesh.
Berta Piñán ye llicenciada en Lengua y Literatura castellana pela Universidá d'Uviéu y miembru de númberu de l'Academia de la Llingua Asturiana dende l'añu 2008. Rescampla'l so llabor poéticu con poemarios como Vida privada (1991) o Temporada de pesca (1998), asina como'l de narradora en llibros de rellatos como La tierra entero (1999) y La maleta al agua (2006).
Coincide la espublización de la obra Arroz, agua y maíz cola publicación d'otra obra suya empobinada al públicu más mozu, L'estranxeru, de la editorial Trabe.