La empresa Gonzali Producciones tien en marcha un casting col oxetivu de crear un bancu de voces pa doblaxes futuros al asturianu pa la TPA. El perfil buscáu ye’l de persones con esperiencia en llocución o doblaxe, adultos y neños.
La toponimia tradicional de Bual yá ye oficial. El Conseyu de Gobiernu dio lluz verde a l’aprobación de los topónimos del conceyu occidental y tamién a la modificación de trés nomes de llugar de Carreño por pidimientu de la Casa Conceyu.
‘Teatru y figures rituales n’Asturies’ ye’l nome del trabayu qu’Antón Caamaño dedica al teatru ritual. L’actor y direutor d’escena reivindica esta estaya poco conocida del teatru popular como ún de los pegoyos onde s’afita’l teatru asturianu.
Coincidiendo cola celebración de los Xuegos Olímpicos de Sochi plantegamos a los nuesos usuarios en ‘Conceyu Abiertu’ si-yos prestaben los deportes d’iviernu. El 52 por cientu declárase aficionáu a estes modalidaes.
La iniciativa popular Podemos aconceyó con Izquierda Unida (IU) dientro de la ronda de contautos que ta calteniendo con formaciones polítiques. Na reunión averaron postures y decidieron abrir un alderique sobre’l programa pal 25-M.
La obra ganadora del VI Premiu Fierro Botas, ‘L’espeyu onde miranos: televisiones de proximidá n’Europa Occidental y procesos de recuperación identitaria’, yá ye una realidá. El so autor ye Damián Barreiro y la edición, de Trabe.
Esti vienres, 21 de febreru, la comunidá mundial celebra'l Día Internacional de la Llingua Materna. La falta d’oficialidá marca esta xornada n’Asturies, onde nel añu últimu l’idioma nun vivió avances significativos qu’ayuden a la so consolidación.
La sociedá asturiana mueve ficha énte la llei de reforma del sector públicu que va regular a la RTPA. Ventiséis coleutivos roblaron un documentu con 5 puntos “irrenunciables” nel que demanden “unos medios públicos al serviciu d’Asturies”.
José Ramón García ‘Monchu’ ufrió’l martes nel Atenéu Obreru de Xixón la charra ‘La simboloxía precristiana na ilesia del Reinu d’Asturies’, entamada por Ástura. La bayura d’información fixo que quedaren munchos asuntos nel tinteru.
