El periodista Naciu Varillas va ser el responsable de presentar el primer boletín de noticies n’asturianu de la RPA na historia de la emisora. L’actualidá en llingua asturiana na radio pública va dase a les 13 hores, de llunes a vienres.

La comunidá Softastur punxo esti vienres a disposición de tolos usarios de dispositivos Android l’aplicación de mensaxería nel intre Telegram en llingua asturiana. A media tarde, el númberu de descargues superaba les 700.

El Teatru Prendes de Candás foi’l llugar escoyíu pola estaya d’Izquierda Xunida (IX)  ‘Faciendo país’ pa presentase en sociedá. El so coordinador, Víctor Suárez, señaló que surde p’afitar el compromisu pa col asturianismu de la coalición.

Esti sábadu ta convocáu un Conceyu Nacional de Conceyu Abiertu con un puntu únicu nel orde del día: les Europees del 25 de mayu. El refugu de les CUP a participar nestes eleiciones podría marcar la decisión de la militancia.

María Esther García, conceyala de Cultura de Castrillón por IX, declaró nún de los programes últimos de ‘Iniciativa pol Asturianu nes ondes’ que nun podía utilizar l’asturianu nel Plenu. Afirma que cola oficialidá nun se daría esti casu.

El sábadu va fallase’l II Premiu Timón de Cultura Asturiana, del que yá se conocen los nominaos. L’Asociación Cultural L’Arribada tamién fixo públicu’l nome de los aspirantes a los gallardones que reconocen la trayeutoria d’escritores.

Dos de los finalistes del VIII Premiu al Meyor Cantar, que va celebrase’l vienres na Llaboral, resultaron gallardonaos colos AMAS de categoría folk. ‘Volviche’, d’El Trasno, ganó como meyor cantar y Vrienden llevó’l títulu de meyor discu.

El grupu de folk electrónicu Xera continúa col so enfotu d’ufrir al públicu esperiencies sonores diferentes. Asina, ta preparando un conciertu cuadrafónicu na sala Sir Live d’Uviéu –inaugurada’l xueves– pal vienres 4 d’abril.

Un mes depués, un temporal nuevu azotó la costa asturiana. Según espliquen dende Fomentu, los estrozos foron importantes, anque non como na vegada anterior. Cuideiru, El Porto, Tapia y Lluanco, les poblaciones más afeutaes.

Coincidiendo col 125 aniversariu de la primer narración fecha n’asturianu con dibuxu artísticu, la Selmana de les Lletres Asturianes va tar dedicada al cómic. L’eventu va celebrase del 2 al 11 de mayu baxo’l lema ‘Dibuxando un camín’.