Un 52 por cientu de los llectores d’Asturies.com declárase aficionáu a los deportes d’iviernu

Coincidiendo cola celebración de los Xuegos Olímpicos de Sochi plantegamos a los nuesos usuarios en ‘Conceyu Abiertu’ si-yos prestaben los deportes d’iviernu. El 52 por cientu declárase aficionáu a estes modalidaes.

Por contra, un 48 por cientu dixo nun ser siguidor d’unos deportes que tán algamando cada vegada una mayor repercusión nel país, como amuesa l’asistencia que rexistren cada añu les estaciones d’esquí de Valgrande-Payares y Fontes d’Iviernu, a lo qu’hai que sumar los aficionaos a otres práutiques, como l’esquí de travesía o’l splitboard, que nun necesiten d’estaciones. Sicasí, Asturies nun tien nin tradición nin instalaciones afayadices pa la mayor parte de les modalidaes que se desendolquen nos xuegos olímpicos, lo qu’esplica l’ausencia de representantes del país na edición vixésimosegunda d’esta cita que tien llugar cada cuatro años y que nesta ocasión celebróse na población rusa de Sochi.

El medayeru del eventu multipedortivu tuvo domináu por Rusia, con 13 oros, 11 plates y 9 bronces, pa sumar un total de 33 medayes. El segundu llugar foi pa Noruega (11-5-10) y el terceru, pa Canadá (10-10-5), mentes que l’Estáu español nun algamó nengún ésitu. Agora, tres el final de la cita, llega’l turnu de los Xuegos Paralímpicos d’Iviernu, que van celebrase del 7 al 16 de marzu.

Dende esti mesmu momentu yá ye posible participar nun ‘Conceyu Abiertu’ nuevu. Nesta ocasión queremos conocer si los nuesos llectores faen boicó a aquelles empreses que zarraron les sos plantes n’Asturies o qu’amenacen con facelo.