Presentóse’l cartel del XXI Conciertu pola Oficialidá

|

La Xunta pola Defensa de Llingua Asturiana ta acabante de dar anuncia de qué grupos van actuar nel XXI Conciertu pola Oficialidá. Rock y folk son otra vuelta los sones que van llenar carpa onde la reivindicación llingüísitica entama una fiesta pol futuru de la llingua asturiana.
 
Hai pocos festivales de música asturiana que tengan tantos años, y qu'amás cada añu medre en públicu y calidá. Dempués de celebrar l'añu pasáu 20 años con una doble ración, 2 díes de música, en 2009 el Conciertu pola Oficialidá vuelve al formatu habitual  d'un día. El conciertu va llantase onde lo fexo n'ocasiones anteriores, nel Campus d'Humanidaes de la Universidá d'Uviéu. Ellí van tar la carpa xigante y los dos escenarios de grandes dimensiones onde se van xubir los grupos participantes nesti conciertu, qu'otra vuelta más de manera desinteresada, amuesen el so compromisu y sofitu pa cola reivindicación d'oficialidá de la llingua asturiana.
 
Los grupos d'esta XXI edición son una perbona selección de lo meyor que se ta faciendo en música n'asturianu. Pela parte folk van tar Tuenda, Los Gatos del Fornu,  Felpeyu y La Bandina, y nuna estaya más electrificada y rockera Skama la Rede, Dixebra y Skontra.  Les siete hores de música que van ufiertar estos grupos tien un preciu bien modestu, 8 euros anticipada,  10 euros na puerta. Les entraes van tar a la venta a partir de la selmana que vien n'Uviéu: La Casa Posafuelles. Xixón: El Trisquel, El Barucu y Llibrería Alborá. Avilés: El Cafetón. Candás: La Gueta. Tinéu: Mesón Cervantes. Cangas: Bar Azul. La Puela Allande: Café Centro. Mieres: L'Abellugu. La Pola L.lena: La Xarrina. La Felguera: El Llar de Keko. L'Entregu: Tom Mallory. Llaviana: El Riscar. La Pola Siero: Abre César. Nava: La Posta. L.luarca: Panadería Andrín, Estancu Cachona.

Contador Estadistiques