Día del Llibru Asturianu

El Conceyu por Otra Función Pública denuncia que'l gobiernu asturianu creó más de cien puestos d'asesores nos últimos 3 años

|

Según el Conceyu por Otra Función Pública n'Asturies, l'alministración asturiana tien creaos nos últimos 3 años mas de 100 nuevos puestos cola "denominación de Coordinador o Asesor, de nivel 26 o superior, asitiaos, nos más de los casos, ente les Xefatures de Serviciu y de Seición, toos ellos nomáos a déu". Asimesmo conseñen que'l "coste económicu que supón caltener esta nueva estructura de 100 puestos d´élite nel añu 2009 ronda los cinco millones d´euros ( 850 millones de les antigues pesetes)".

En palabres d'esti colectivu, "el xorrecimientu continu del enfotu personal y políticu como criteriu de seleición n’Alministración del Principáu d’Asturies supunso la creación nos caberos tres años de más de 100 nuevos puestos. Un esamen sollerte de les funciones y característiques de talos puestos evidencia que los más d’ellos nun respuenden a necesidaes oxetives derivaes del serviciu públicu –necesidaes que, d’otra miente, enxamás s’espresen nin xustifiquen nos alcuerdos de creación d’estos puestos- sinón más bien a una política de personal empobinada a la fidelización de los funcionarios escoyíos, que furrula como una castra de nuevu 'enfeudamientu' nel que l’emplegáu públicu vincúlase personalmente al políticu que lu noma".

Según afita'l Conceyu por Otra Función Pública n'Asturies "son cada vegada más corrientes, particularmente ente los funcionarios de los Cuerpos Superiores, los ascensos darréu de la toma de posesión como nuevos funcionarios de carrera a puestos de llibre designación, nuna carrera profesional meteórica sofitada esclusivamente nel enchufe personal, lo que ta convirtiendo la carrera profesional oxetiva, conforme a los principios de méritu y capacidá, nun instrumentu en pelligru d’estinción nel Principáu d’Asturies".

Finalmente conseñen que "mientres, el populismu gubernativu amenaza a la 'tropa de funcionarios' cola conxelación salarial".

Contador Estadistiques