Más de 9.000 persones yá “dieron la cara pola Oficialidá"

La campaña “Doi la Cara pola Oficialidá”, entamada pol Conceyu Abiertu pola Oficialidá, yá tien el sofitu de más de 9.000 persones nuna iniciativa na que tan dando “lliteralmente” la cara a favor del reconocimientu oficial pa la llingua asturiana.

El Conceyu Abiertu pola Oficialidá felicítase “pola rápida y progresiva consecución de los oxetivos que se marcaron cuando se definió esta campaña: amosar el respaldu mayoritariu a la reivindicación llingüística y facer rescamplar qu’esi apoyu trescala tolos ámbitos sociales y xeneracionales de la sociedá asturiana, lo que sirve pa evidenciar que la verdadera protagonista del procesu de recuperación llingüística ye una ciudadanía plural y non sectaria que camina mui per delantre de la nuestra acomodada clase política”.

Según el CAO “la oficialidá ye l’únicu pegoyu sobre’l que sofitar un futuru de sobrervivencia amañosu pal nuestru patrimoniu llingüísticu. Ye l’únicu rangu constitucionalmente posible y ye lo que tienen reconocío cuantayá’l restu de llingües del Estáu. La oficialidá del asturianu nel Estatutu d’Autonomía ye la metá del camín que tamos andando ente toos y la participación ciudadana, como queda espeyao nesta iniciativa, el mediu pa consiguilo”.

El CAO conseña que “d’equí a poco, el próximu día 3 de xunu, va cumplise un añu dende que’l Conceyu Abiertu pola Oficialidá puso en marcha esta iniciativa. El llogru de 10.000 apoyos nel primer añu va valir pa sumar munchos más nos prósimos meses. Pa ello, el Conceyu Abiertu pola Oficialidá va entamar a llevar la campaña a los conceyos, villes y pueblos d’Asturies”.