Gastronomía asturiana con acentu británicu

Un equipu de la revista británica “Food and Travel”, distribuida en dellos países anglosaxones, visita Asturies pa publicar un reportaxe sobro la mariña y los sos productos.

El viaxe, que foi entamáu pola Sociedá Rexonal de Turismu en collaboración cola Oficina Española de Turismu en Londres, va traducise nun reportaxe d'ocho a diez páxines.

Dende ayeri, llunes, y hasta el próximu vienres 30 d'abril, los reporteros Michael Rafael y Carl Pendle van percorrer la mariña asturiana d'oriente a occidente descubriendo la vida de los pueblos costeros, la nuesa ufierta de turismu rural y la cultura gastronómica asturiana más venceyada al Cantábricu.

La revista “Food and Travel” distribúyese en tol mercáu anglosaxón (Reinu Xuníu, Australia y Estaos Xuníos) a llectores d'alto poder adquisitivu y de prescripción, asina como alta vocación viaxera. El so públicu viaxa una media de 3 vegaes al añu, y más del terciu de el llectores muévese frecuentemente por trabayu al estranxeru. La revista ta reconocida por dellos Premios a la Excelencia Editorial y Publicitaria (“PPA Magazines Awards”, consideraos los ‘Oscar’ de la industria editorial).

Esti viaxe de prensa englóbase dientro d'un plan d'acciones de promoción del turismu gastronómicu que va traer mientres el próximu mes a Asturies a medios especializaos como “Sobremesa”, el suecu “Svenska Dagbladet”, la cadena británica BBC y el programa de TVE “Un país para comérselo”.