'Asturllétric'; tradición, electrónica y llingua pola oficialidá

El miércoles 5 de mayu preséntase nel Posafuelles el discu añal de la Xunta pola Defensa de la Llingua, nesta ocasión esplora la rellación ente música asturiana y electrónica.

‘Asturllétric’ ye’l discu que quier sirvir de banda sonora a les movilizaciones qu’esti añu s’entamen a favor del asturianu. El CD incluí doce cantares, ente ellos ‘Ramu pola oficialidá’, el sestu cantar que compón Músicos pola Oficialidá pa sofitar la reivindicación llingüística. Los anteriores dende 2004 foron ‘Fala’, ‘Alantre’, ‘Arguyosu’, 'Garra  la pallabra' y ‘Ye lo que nos pasa’.

El cantar de 2010 amesta sobre una base de música electrónica les voces de cuarenta pandereteres qu’abrieron la manifestación pola oficialidá del Día de les Lletres de 2009 al son d’un ramu tradicional con lletres reivindicatives.

“Ye la llingua de mio güela, ye la llingua del mio güelu, tamién quiero que la falen la mio neña y el mio neñu” o “una llingua reprimida, una llingua marxinada, una llingua que se pierde y el Gobiernu nun fai nada”, son dalgunes de les cuartetes que quieren sirvir de ferramienta p’averar tradición, futuru y reivindicación a la música asturiana.

El discu incluí tamién once cantares más, un piñu de pieces que muestren les rellaciones ente la llingua del país y la música electrónica (house, ambient, tecno, drum n’bass, chill out, etc…), como amuesa del valir del idioma pa toles espresiones músicales.

Los temes son reellaboraciones de dellos de los grupos más punteros del país; ‘Gallegada de Tinéu’ de Balandrán, ‘Onde vas por agua’ de Corquiéu, ‘Dame sidra’ de Tutu Studiu, ‘Güeria’ de La Coḷḷá Popinde, ‘Nun voi sola’ d’Herbamora, ‘Tierra’ de Xera, ‘Na caleya’ de La Bandina, ‘Somos’ de Dixebra, ‘Soncai’ de Soncai System, y ‘Agua’ de Toli Morilla, son los cantares que completen el discu.

‘Asturllétric’ yá ta disponible nes tiendes de discos, o na propia Casa Posafuelles, dende’l pasáu sábadu 24 d’abril, día nel que se celebró’l Conciertu pola Oficialidá. La cita entama a les 20.30 hores en La Casa Posafulles y depués de la presentación Da Robotz va facer una sesión de música folk electrónica.