Bolivia da puxu na educación a les llingües autóctones

El gobiernu de Bolivia aprobó una nueva llei d’educación qu’afita como llingua vehicular na enseñanza aquella que predomine en cada fastera.

“La llingua predominante sedrá la que s’usará nes aules”, afita esta llei denominada como “Avelino Siñani-Elizardo Pérez” que da puxu a les llingües autóctones de cada fastera, en cuenta de da-ylo namás al castellanu, llingua predominante hasta la fecha.

El gobiernu d’Evo Morales presenta esta llei de mou renovador, yá que nesti estáu llatinoamericanu fálase castellanu, quechua, aimara, guaraní y más de trenta llingües indíxenes más. Según fontes oficiales, un 87,4% de la población entiende y fala’l castellanu; un 34,4% pue entender y falar el quechua; y un 23,5% l’aimara.

Escuela llaica
Xunto a los derechos llingüísticos, la nueva llei d’educación afita la llaicidá de la educación. D’esti mou, la Ilesia católica refuga la reforma porque, según argumenten, nun garantiza “la llibertá de conciencia, de fe y d’enseñu de la relixón”.