El Conseyu de Política Fiscal y Financiera (CPFF) aprobó por unanimidá'l Plan Económicu y Financieru de reequilibriu 2012-2014 (PEF) de 498 millones d'euros presentáu pol Gobiernu d'Asturies, dempués de que l'últimu Conseyu celebráu'l pasáu 17 mayu refugara'l presentáu pol anterior Gobiernu de Francisco Álvarez-Cascos.
 

La Xunta Xeneral vien de reclamar esti xueves al gobiernu español, nuna sesión plenaria col conflictu de la minería como únicu asuntu, el cumplimientu de los alcuerdos adoptaos y la suspensión de los retayos al sector.

El XVI Festival Intercélticu d’Avilés, que va celebrase ente los díes 16 y 22 de xunetu, dio anuncia de la so programación completa. Ente los artistes que van actuar destaquen los quebequeses “La Bottine Souriante”, el gallegu Carlos Nuñez y los artistes bretones Dan Ar Braz y Gwennym.
 

El presidente Mariano Rajoy ta acabante de dar anuncia de que'l Gobiernu va xubir l’IVA del 18%  al 21%, y el reducíu del 8% al 10%, Asimesmo los nuevos paraos verán amenorgaes les prestaciones a partir del sextu mes del 60 al 50% de la base reguladora.
 

Los mineros de la 'Marcha Negra' acabaron na Puerta del Sol de Madrid minutos antes de les dos de la madrugada una marcha nocherniega peles cais de la capital, que tuvo caracterizada pol ambiente festivu y la solidaridá ciudadana, con miles de persones que s'echaron a les cais pa tresllada-yos el so apoyu.
 

La Tertulia Malory, de L'Entregu, escoyó como meyor llibru n'asturianu de tolos editaos nel 2011 el poemariu “La ñeve del cuquiellu”, del escritor Xabiero Cayarga. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Roberto Corte, Chechu García y Henrique G. Facuriella, que fallaron el premiu nuna sesión especial de la tertulia celebrada en Peñamayor en xunu.

Esti vienres 13 de xunetu la Tertulia Pachín de Melás va falar sobre “Educación pública asturiana: crisis económica o cambiu de modelu” ónde se va tratar la problemática de la educación pública “ante les midíes d'axuste aplicaes enantes y les nueves que s'anuncien pal cursu que vien, y si tales midíes respuende solamente a una crisis económica o si escuende un cambéu de modelu na educación pública asturiana”.

La Pola L.lena foi la pasada nueche otra vuelta escenariu de les protestes de los mineros qu’acabó con trés deteníos. Ayer nueche a la colocación de delles barricaes siguió la intervención de la Guardia Civil, una actuación que ta xenerando crítiques polo desproporcionada de la mesma.

La Casa de les Llingües, institución dependiente de la universidá asturiana dedicada al enseñu d’idiomes, vuelve a ufrir pal cursu 2012-13 un cursu d’asturianu correspondiente al nivel A1, el más básicu dientro de los niveles qu’afita la UE pal deprendizaxe d’idiomes.

 El ministru de Facienda y Alministraciones Públiques, Cristóbal Montoro, confirmó que'l Gobiernu trabaya nuna subida d'IVA que nun se taría discutiendo si l'impuestu “lu pagaren tolos que tienen que pagalo”.