La 'Marcha Negra' acaba en Sol el so percorríu de nueche peles cais de Madrid

Los mineros de la 'Marcha Negra' acabaron na Puerta del Sol de Madrid minutos antes de les dos de la madrugada una marcha nocherniega peles cais de la capital, que tuvo caracterizada pol ambiente festivu y la solidaridá ciudadana, con miles de persones que s'echaron a les cais pa tresllada-yos el so apoyu.
 
L'actu central de les reivindicaciones de los mineros, que protesten pol recorte nes ayudes del sector del 63% incluyíu nos PXE pal 2012, va tener llugar esti miércoles, con una manifestación que va partir de Colón y va acabar frente al Ministeriu d'Industria.
 
   Los más de 300 mineros que componen la 'Marcha Negra', tres la unión de la columna Norte --Asturies y Castiella y Lleón-- y el Sur --Aragón, Castiella-La Mancha y Andalucía--, entamaron pasaes les 22.30 hores en Ciudá Universitaria una marcha nocherniega que llegó a lo último a Sol, una hora dempués del horariu previstu y nun ambiente festivu.
 
   Na emblemática plaza madrilana aguardaben dende hores antes dellos centenares de persones qu'aguantaron nel 'kilómetru ceru' a pesar del retrasu pa treslladar la so solidaridá a los mineros. L'asistencia yera tala que foi necesario facer una llenda pa permitir la entrada de los mineros nesti céntricu enclave de la capital.
 
   Un atronador aplausu y glayíos de 'Sí se puede' o 'Sois héroes' recibieron a los mineros nuna atarraquitada Puerta'l Sol, onde la pancarta principal rezaba 'Marcha minera 2012. Bienveníos a Madrid. Pol futuru del carbón' y onde una banda cantó-yos l'himnu mineru, 'Santa Bárbara Bendita'.
 
   Dos de los integrantes de la 'Marcha Negra' agradecieron les muestres de solidaridá recibíes dende que'l pasáu 22 de xunu entamaron el so viaxe a Madrid y alvirtieron al ministru d'Industria, José Manuel Soria, que nun los van "doblgarán". "Nun tamos avezaos a vivir de rodielles. Fuerces nun mos falten", dixeron los mineros, que recordaron que son "lluchadores" y tán apoyando una causa "xusta y solidaria".  
 
   Los mineros entamaron la so marcha nocherniega ataviaos coles sos prendes habituales de trabayu, cascos, llámpares y llinternes en Ciudá Universitaria a les 22.30 hores, tres disfrutar d'una cena y un pequeñu descansu dempués de 19 díes de caminada, pa percorrer dempués les cais Princesa, Gran Vía y, a lo último, la cai Alcalá, dende onde accedieron a la Puerta'l Sol.
 
   Una marcha na que los recibieron con aplausos y frases d'apoyu y bienvenida como 'Madrid, obrero, apoya a los mineros', 'Madrid, entero, siéntese minero', 'El pueblu uníu, enxamás será vencíu' o 'Éstos son los nuesos héroes y non la selección'. Delles bandes de música y gaiteros fueron les encargaes de poner la banda sonora.
 
   Colectivos sindicales como UXT y CCOO --encabezaos polos secretarios xenerales, Cándido Méndez y Ignacio Fernández Toxo, respectivamente--, partíos políticos --Izquierda Unida, PCE, PSOE--, y movimientos ciudadanos como'l 15-M o los bomberos y profesores de la Comunidá de Madrid que protesten contra los recortes fueron sumándose a lo llargo del percorríu en solidaridá colos mineros.
 
   Los miles de madrilanos que s'echaron a les cais ficieron que l'avance de la marcha se ralentizaren, de manera que tardaron más d'una hora en llegar hasta'l faru de Moncloa, onde centenares de persones diéron-yos la bienvenida con cohetes y una banda de música recibiólos al son del himnu mineru. El tráficu nesa zona, asina como en Princesa y Gran Vía y les cais llenderes, sufrió les consecuencies y rexistráronse atascos y cortes na circulación.
 
   Na cabecera de la marcha colocáronse casi dende'l primer momentu una ventena de bomberos de la Comunidá de Madrid, que protesten polos recortes, pa permitir que los mineros pudieren avanzar por cuenta de la gran asistencia de madrilanos. Tres ellos, los integrantes de la 'Marcha Negra' dispuestos por columnes y ataviaos coles sos yá vezaes camisetes negres, en contraste coles verdes que portaben dellos ciudadanos col lema 'Sí a la reactivación de les comarques mineres'.
 
   Mientres el so percorríu poles cais madrilanes, los mineros portaron banderes de les comunidaes mineres y pancartes contra los recortes nes ayudes del sector, nes que podía lleese 'Nacionalización de les mines baxo control mineru' o 'Si nun hai carbón, ¿qué nos van a trayer los Reis Magos?'.
 
   Sicasí, los cantares mayoritarios fueron pa recordar al Gobiernu de Mariano Rajoy que nun van ceder na so llucha hasta llograr una solución. 'De norte a sur, d'este a oeste, la llucha sigue cueste lo que cueste', 'Si esto nun s'arregla, guerra, guerra, guerra', 'Si nun hai solución, va haber revolución' o 'Hoy banderitas, mañana dinamita' fueron algunos de los berros que llanzaron contra l'Executivu del PP.
 
   L'ambiente de la marcha foi fundamentalmente festivu y nun se rexistraron incidentes, anque se llanzaron delles bengales. Mientres el percorríu, la presencia policial foi escasa hasta llegar al altor de Ventura Rodríguez, na cai Princesa, onde seis furgones de la Policía Nacional ubicáronse na cabecera de la marcha.
 
PASU PELA MONCLOA
 
  Los únicos incidentes reseñables rexistráronse cuando los mineros pasaron al altor de La Moncloa, residencia oficial del presidente del Gobiernu y blindada baxo un fuerte dispositivu de seguridá. Ellí, los más de 300 mineros de la 'Marcha Negra' aprovecharon pa intensificar los sos berros y cantaraes contra Mariano Rajoy y el so Executivu. 'Somos mineros, non terroristes' o 'Fuera, Rajoy' fueron algunos de los lemes que profirieron, acompañaos por continuos xiblíos y pitos.
 
   Otru momentu de tensión foi'l que vivió'l diputáu socialista y exministru de Defensa, José Antonio Alonso, qu'a la so llegada a Ciudá Universitaria recibiéronlu con urriaes per parte d'una parte de los arrexuntaos, que-y reprocharon qu'apoye al sector mineru qu'agora que'l so partíu ta na oposición pero que nun ficiera nada cuando'l PSOE taba nel Gobiernu.
 
   En Ciudá Universitaria, onde los integrantes de la 'Marcha Negra' teníen previsto pasar la nueche pernoctar, recibiólos una comitiva docente encabezada pol rector de la Universidá Complutense, José Carrillo, que-yos dixo que "ye un honor y un arguyu" da-yos la bienvenida.
 
   Tamién aguardaba la so llegada'l rector de la Universidá Politécnica, Pedro Conde, asina como una representación del PSOE encabezada pol secretariu d'Organización, Óscar López, la vocera parlamentaria, Soraya Rodríguez, el secretariu d'Ordenación del Territoriu, Hugo Morán, asina como'l líder de los socialistes madrilanos, Tomás Gómez.