Rubiera desea que’l VIII Premiu Fierro Botas “sía otra vez un ésitu de participación y de resultáu”

El Conceyu de Xixón convocó’l VIII Premiu d’Ensayu y Trabayos d’Investigación Fierro Botas, concursu que l'edil Carlos Rubiera espera que sía “otra vez un ésitu de participación y de resultáu pola calidá de los trabayos”. El ganador de la sétima edición foi Martín Pérez Álvarez con ‘Curandeiros, compostores y outros sanadores’.

El conceyal d’Educación, Cultura, Xuventú y Fiestes presentó per vegada cabera esti gallardón –hai tiempu qu’anunció que nun continuaría como edil– acompañáu por Xosé Nel Riesgo, direutor de la Fundación Municipal de Cultura, Educación y Universidá Popular, y Verónica Rodríguez Fernández, responsable de la Oficina de Normalización Llingüística, “que representen la continuidá de la institución y la garantía de la celebración d’esta edición del Premiu Fierro Botas”. Esti gallardón entámase n’alcordanza del xesuita Federico González-Fierro Botas, espertu en llingua asturiana que finó n’accidente de tráficu en Rusia nel 2002, y reconoz el llabor de los investigadores asturianos na llingua del país.

“Ye un premiu que va acumulando a lo llargo d’estes ediciones trabayos e investigaciones mui interesantes que van dexando un corpus d’investigación nel nuesu idioma, en dalgunos casos yá de referencia”, apuntó Rubiera, poniendo como exemplu l’ensayu d’Inaciu Hevia Llavona sobre la botella de sidra de Xixón. Pa participar nél ha de presentase un estudiu d’investigación en llingua asturiana o gallego-asturiano sobre la cultura rusa o eslava, la memoria social y coleutiva de los pueblos rusu y asturianu, o la memoria social y coleutiva de Xixón. La recompensa pal ganador ye de 3.000 euros y la espublización del so trabayu.

Rubiera recordó que los trabayos han de ser orixinales y inéditos, y apuntó que’l plazu pa entregalos –per triplicáu en cualesquier de los Rexistros del Conceyu de Xixón– fina’l 9 d’ochobre. El fallu del premiu conoceráse’l 27 de payares, coincidiendo cola estancia na ciudá del sobrín de González-Fierro Botas, Jaime González Fierro-Botas. L’edil tamién quixo na so intervención emponderar la figura del xesuita, del que destacó la so calidá como persona y “la so formación amplísima”, amás del so compromisu pa cola llingua asturiana y l’estudiu de la llingua rusa y la lliteratura soviética.

Presentación nel IV Festival Arcu Atlánticu

El testu ganador del VII Premiu d’Ensayu y Trabayos d’Investigación Fierro Botas, de nome ‘Curandeiros, compostores y outros sanadores’, firmáu pol enfermeru y fisioterapeuta Pérez Álvarez, yá ta n’imprenta y va presentase nel trescursu del IV Festival Arcu Atlánticu, qu’esti añu va celebrase del 24 de xunetu al 2 d’agostu, según confirmó Rubiera. L’ensayu, escritu en gallego-asturiano, afonda na medicina tradicional tres la realización d’un importante trabayu de campu y recoyida de tradición oral.

Na semeya, Rodríguez Fernández, Rubiera y Riesgo.