Arboleya considera que les Nacionales marquen “un puntu d’inflexón qu’obliga a redefinir tol asturianismu políticu”

Andecha Astur fixo una valoración de los sos resultaos eleutorales al traviés del so candidatu, Paulo Arboleya. La formación nacionalista cree que marquen “un puntu d’inflexón qu’obliga a redefinir tol asturianismu políticu”.

Col 99,37 por cientu escrutáu, el númberu de votos que sumó Andecha foron 970 (0,18 por cientu), lo que supón una medra curtia con respeuto a les anticipaes del 2012 –nesa cita coles urnes algamó 674 (0,13 por cientu)–. "Los resultaos, con ser los esperables y vese perafeutaos pol pucherazau sufríu, nun se correspuenden cola capacidá d’incidencia social y política d’Andecha Astur, y son un puntu d’inflexón qu’obliga a redefinir tol asturianismu políticu”, afirma Arboleya, que cree qu’ha de plantegase “oxetivos realistes”. “Sabemos que les nueses propuestes polítiques calen na sociedá asturiana y lleguen a ser asumíes dafechu, pero ye la hora de que seyamos nós los que les rentabilicemos, y pa esa xera faen falta toles manes. Dende agora mesmo ésti tien de ser l’oxetivu”, añade tres criticar “la fuxía de seutores que se reclamaben comu nacionaliegos/soberanistes hacia opciones estatalistes que ven a Asturies comu una sucursal, y non comu una nación de plenu drechu”, lo que “vien a esclariar muncho’l panorama políticu y desplica por qué tolos intentos d’algamar una xunidá d’aición con ellos resultaron inútiles”.

Sobre la retirada de les papeletes de la formación, tanto en castellanu como n’asturianu, nun centenar de colexos eleutorales por tar en llingua asturiana, el candidatu considera que “debiere ser abondo pa invalidar estes eleiciones, pero nun teo dengún enfotu na calidá democrática española”. D’igual forma, emponderó l’apuesta nos conceyos poles candidatures de xunidá popular, poniendo como exemplu a Conceyu Abiertu por Noreña, que “vio recompensáu’l so esfuerciu, duplicando’l númberu conceyales”.