Les eleiciones a conceyos dexen dellos resultaos positivos pal asturianismu

Los resultaos en dellos conceyos foron positivos pa organizaciones de calter asturianista marcáu. El PAS sumó 3 conceyales en Bimenes con un 23,43 por cientu de los votos, dos representantes más que nel 2011, y Conceyu Abiertu por Noreña suma un segundu edil tres rexistrar un 14,63 por cientu.

La disolución del Bloque Independiente de Bimenes, que tenía mayoría absoluta, propicia una situación nueva nel conceyu. El PSOE, que nun tenía representación, ganó les eleiciones al sumar 4 conceyales, polos 3 del PAS y el que lleva IX y Xente Yerbato. Aitor García Corte, María Menéndez Sánchez y Manuel Rodríguez Onís van ser los ediles asturianistes en Bimenes.

Otru bon resultáu rexistróse en Noreña, onde Conceyu Abiertu pasa a ser la tercer formación más votada per detrás d’Independientes por Noreña (4) y PSOE (3). Izquierda Xunida sumó 2 ediles y el PP y Foro, 1. D’esta forma, Pablo Pérez va tar acompañáu na Casa Conceyu nesta llexislatura por Antonio Martínez tres sumar 400 votos, 133 más que nel 2011. Inaciu Iglesias, de Foro, repite como conceyal.

Asturianistes por Nava repitió resultáu al sumar 3 ediles, pero la mayoría absoluta del PSOE (pasa de 5 a 7 conceyales) va impidir a Emilio Ballesteros aspirar a un relevu na alcaldía. Hai cuatro años consiguiólo col sofitu de Foro (3) y PP (2), que nesta ocasión ve menguada la so representación a 1 caún. Agora Nava, candidatura de xunidá popular, tamién entra nel Consistoriu con 1 edil.

Consiguió caltener el so conceyal, pese a les dificultaes atopaes, Compromisu por Ḷḷena, polo que Xosé Agripino Pérez Acebal va continuar una llexislatura más. IX torna a ganar pese a perder un edil (de 8 a 7), pero’l PSOE recupera 2 (de 4 a 6). El PP mantién 2 y Foro queda ensin representación.

Cerca, en Mieres, Izquierda Asturiana (IAS) suma un conceyal gracies al alcuerdu eleutoral con IX, qu’algamó un 48,93 por cientu de los votos y dos conceyales más que nel 2011 pa llegar a los 12. Faustino Zapico, númberu 8 de la llista de la coalición, ocupará cargu de gobiernu, tal y como afita’l pautu ente les dos formaciones. El PSOE resultó la segunda fuercia más votada (4), siguíu del PP (3) y Somos Mieres (2). Foro pierde los sos dos representante.

L’Agrupación Morciniega Independiente (AMI) tamién consiguió mantener al so representante ameyorando resultaos, yá que pasa d’un 9,32 por cientu de los votos a un 13,77 por cientu, pasando a ser tercera fuercia del conceyu. Jesús Menéndez Martínez va ser el conceyal d’AMI. Mentes, el ganador en Morcín foi otra vuelta’l PSOE, anque nesta ocasión d’una manera mui axustada con IX, dambos con 4 conceyales. Tamién va tener sitiu na Casa Conceyu Somos Morcín (1) y PP (1). Foro pierde los sos dos representantes.

Na parte negativa, MAS Corvera nun consiguió’l resultáu esperáu y quedó nun 2,39 por cientu. Nesti conceyu ganó con mayoría absoluta’l PSOE (de 6 a 10 conceyales) y algamó representación Somos Corvera (2), IX (2), PP (1), Unión Social Progresista de Corvera (1) y Foro (1).

Candidatures de xunidá popular

En Carreño, l’otru conceyu onde Compromisu por Asturies tenía representación, la federación de partíos sofito la candidatura de xunidá popular Somos Carreño, que sumó 4 ediles, los mesmos que’l PP nunes eleiciones que tornó a ganar el PSOE (6) y na qu’IX llevó 3. A diferencia de nel 2011, la Casa Conceyu nun va tar tan fragmentada, pasando d’ocho partíos a cuatro.

Mentes, n’Avilés, Xune Elipe va ser conceyal por Somos Avilés –tamién el so compañeru en Dixebra, Primi Abella–, qu’algamó 5 ediles, trés menos que’l PSOE (8) y dos que’l PP (6). IX sumó 3, Ciudadanos 2 y Ganemos consiguió entrar nel Consistoriu con un representante.

Pueblu, pela so parte, algamó 2 conceyales en Ribeseya, onde Foro ameyoró los resultaos del 2011, al pasar de 5 a 7 ediles. El PSOE quedó con 2 (pierde dos), al igual que’l PP.

Pue consultar tolos resultaos de les municipales nesti enllaz.