El sábadu celébrase ún de los díes más esperaos: el X Día de la Reciella. El Muséu del Pueblu d'Asturies acueye un añu más esta xornada d'actividaes n'asturianu pa toles edaes y gustos, que cuenta con un mercáu lliterariu, musicales y de moda, y recupera la carrera familiar Entaína.

Yá ta equí, recién sacáu del fornu, el cantar del X Día de la Reciella. Lleva’l nome de ‘La familia del asturianu crez’ y de xuru que te suena’l so compositor, Nacho Fonseca, el creador de Seliquín y Xentiquina, que canta xunto cola so fía Esther y la so nieta Manuela simbolizando asina la tresmisión xeneracional del asturianu.

El ciclu ‘Ente Fueyes. Ochobre Lliterariu’ de Xixón ufre delles actividaes pa públicu mozu. Los díes 12 y 13 prográmense talleres, un cuentacuentos y una esposición na Plaza Mayor, onde los asistentes van poder conocer a Xosefa Xovellanos, pero enantes, esti llunes, va representase la obra ‘Les madreñes vacíes’ nel Antiguu Institutu.

El Premiu María Josefa Canellada, el más importante de la lliteratura infantil y xuvenil en llingua asturiana, yá cuenta con ganador. Ye Xosé Anxelu Gutiérrez Morán, autor de la obra ‘Contando colos deos’, que vamos poder lleer l’añu qu’entra.

El 17 de payares va celebrase la primer fase, clasificatoria pa la final, de la Olimpiada Escolar de Redaición. Los centros que cumplen los requisitos pueden participar nesti concursu tan prestosu que l'añu pasáu contó con 120 aspirantes.