Unos alcuentros van promover l’intercambiu d’esperiencies ente poetes n’asturianu y creadores n'otres llingües

Quod Erat Demonstrandum (QED) ye’l nome que recibe’l ciclu poéticu internacional que naz pa promocionar y dar voz a los poetes en llingua asturiana dientro y fuera del país. Autores d’Occitania, Galicia y Euskadi van visitar Asturies esta seronda y ver traducíes creaciones de so pa estos alcuentros que van desendolcase n’Uviéu.

Esti vienres va tener llugar el primeru de dichos axuntamientos, en concreto de Xaime Martínez y Aurélia Lassaque, poeta n’occitanu y francés. Nel mesmu tamién va tomar parte Xosé Antón Fernández ‘Ambás’, que va recitar una escoyeta de poesía tradicional asturiana.

En payares van ser María García y Marta Mori les que se van ver cola gallega Olga Novo, el día 25, mentes que'l 16 d'avientu van lleer xuntos los sos poemes Nacho Vegas, Xuan Bello y el vascu Bernardo Atxaga. El salón d'actos de la Biblioteca d'Asturies ‘Ramón Pérez d'Ayala’ va ser sede de los alcuentros a les 19 hores.

Miguel Rodríguez Monteavaro coordina esta actividá qu’entama l’Asociación Cultural Mezá col sofitu de la Conseyería de Cultura, Política Llingüística y Turismu. QED busca promover l'intercambiu d'esperiencies poétiques al traviés del diálogu d'autores n'asturianu con otros de fuera que caltienen estilos asemeyaos y coherentes cola obra de los creadores asturianos y tien la vocación de ser un puntu d'alcuentru pa los escritores del país qu’apuesten pola calidá lliteraria y promueva la diversidá xeneracional y d'estilos.

Na semeya, Rodríguez Monteavaro y García.