“O entramos nel Gobiernu o hai temes que nun se toquen”, reflexona Ovidio Zapico (La Pola Llaviana, 1971). El candidatu a la presidencia d'Asturies de Convocatoria por Asturies, la coalición que conformen Izquierda Xunida (IX), Más País y Izquierda Asturiana (IAS), afirma que “el PSOE nun cambia”, polo que pretende condicionar la so aición política siendo relevante depués de la cita eleutoral del 28-M.

La formación nacionalista Andecha Astur presenta una cara nueva a estes eleiciones. Ye Diego Morís (Xixón, 1978), trabayador d’ArcelorMittal que ta viviendo una campaña eleutoral marcada pola llucha del partíu coles xuntes eleutorales pa validar les papeletes n’asturianu, pa lo que presentaron un escritu en catalán al ser refugáu ésti nun primer momentu al tar en llingua asturiana.

Cova Tomé (Ḷḷuarca, 1970) ye la candidata de Podemos a la presidencia d’Asturies, pero tamién la cabeza visible d’un equipu de trabayu más ampliu conformáu por Xune Elipe y Laura Tuero, númberos 2 y 3 de la llista. Los trés tán poniendo tol so enfotu pa llevar a la ciudadanía la propuesta del partíu pa tresformar Asturies.

La etapa nueva de Foro, depués de la refundación, tien a Adrián Pumares (Llaviana, 1989) como l'apuesta del partíu pa la presidencia d'Asturies. Bien valoráu por compañeros y adversarios, el llavianés posiciónase a favor del asturianu y, ensin citar direutamente la pallabra 'oficialidá', comprométese a garantizar los derechos de los falantes “con toles implicaciones llegales” que conlleva.