“Ye un reconocimientu importante p’Asturies y pal asturianu tar en México nun eventu d’esti nivel”, apunta García López

El I Encuentro de Poetas Iberoamericanos celebráu en Ciudá de México contó con representación asturiana. María Esther García López participó como convidada pa recitar en llingua asturiana y castellanu –tamién nel estáu d’Hidalgo–, lo que pa la escritora “ye un reconocimientu importante p’Asturies y pal asturianu”.

Nel país norteamericanu la valdesana atopó una “gran hospitalidá y acoyimientu y ciñu. En México sentíme como en casa”, asegura. La investidura l’añu pasáu en Madrid como doctora honoris causa por parte del mexicanu Claustro Doctoral Honoris Causa, actu nel qu’emplegó l’asturianu nel so dicursu, y les collaboraciones que vien calteniendo con delles revistes hispanoamericanes y de New York, facilitó-y la invitación al Encuentro de Poetes Iberoamericanos, con orixe en Salamanca, que s’entamó per primer vez en México baxo la direición de Carmen Nozal n’homenaxe a Sor Juana Inés de la Cruz y Elsa Cross

García López ‘crució’l charcu’ como única representante del Estáu nun certame de 5 díes celebráu del 25 al 29 de setiembre xunto a otros 83 poetes de 20 países distintos, ente ellos “dalgunos académicos de la lengua española en México que tamién recitaron en dalgunes 68 llingües orixinaries qu’hai en Mexico, más de 300 variantes”. Nesi sen, apunta que “recibieron mui bien al asturianu porque ellos aprecien les llingües orixinaries porque tamién les tienen”.

Yera pa ellos un idioma desconocíu “y creo qu’a min m’invitaron precisamente por eso”, reflexona la presidenta de l'Asociación d'Escritores d'Asturies, que definió al asturianu como “un idioma guapísimu pa poesía, con muncha musicalidá”. La llingua asturiana sonó en Ciudá de México “nel muséu de la ciudá, na Universidad del Claustro de Sor Juana, na casa del poeta Ramón López Velarde y na Casa del Libro de la UNAM”, pero tamién nel estáu d’Hidalgo –con rellación anguaño con Asturies al ser la capital, Pachuca, sede del grupu propietariu del Uviéu–, onde se desplazó’l 1 d’ochobre pa participar per dos xornaes nos Ecos del Primer Encuentro de Poetas Iberoaméricano xunto con dos autores mexicanos, Santos Velázquez y Maximiliano Cid, y la propia Nozal.

“La Universidad del Estado de Hidalgo tien 25 sedes y convidáronnos a delles a recitar pa los chavales de preparatoria y tamién pa los universitarios”, rellata sobre unos eventos que s’encargó d’organizar Corina Martínez. En concreto fíxolo en Pachuca, Tulancingo y Tiahuelilpan, amás de participar nun eventu poéticu nel Monasterio de San Francisco de Tepeji del Río.

Invitación pa un actu poéticu en San Diego

“Foi un honor pa min el participar y un viaxe poéticu inolvidable. Amás tuvi l’allegría de recibir ellí a una profesora de la Universidá de San Diego qu’escribe ensayu sobre la mio poesía erótico-amorosa n’asturianu que foi a México de forma espresa a veme y a convidame a un eventu poéticu a California”, cuenta con allegría la de La Degoḷḷada, que tuvo qu’aplazar esa visita polos compromisos que tenía n’ochobre n’Asturies.

García López, que tuvo la oportunidá de facer delles visites culturales y gastronómiques cola organización de los dos eventos, rescampla “l’afición pola cultura y la poesía” del país nortemericanu y queda coles munches esperiencies y persones que conoció. Tamién afirma que se sintió “mui arguyosa del mio idioma, que llevé siempre por bandera, y que-yos encantó. Felicitáronme munchísimu y gustó muncho”.

Y ye que “ye un reconocimientu importante p’Asturies y pal asturianu tar en México nun eventu d’esti nivel”. Nun sería l’únicu, yá que por eses mesmes feches Miguel Rodríguez Monteavaro tamién recitaba n’asturianu y gallego-asturiano un poco más al sur, en Chiapas, nel X Festival Mundial de Poesía Contemporánea San Cristóbal, confirmando l’avance en visibilización internacional de les nueses lletres nos años últimos.

Otru reconocimientu

El 29 d’ochobre foi otru día especial pa García López, yá que’l Movimiento Proyecto Cultural Sur, “una organización a nivel mundial d’autoxestión cooperativa pa la espresión de los escritores y artistes de toles disciplines”, concedió-y Doctoráu Nobilis Causa. “Pola so estraordinaria consecuencia nel trabayu cultural, promoviendo la poesía y les artes en tolos ámbitos, otórgase-y el presente reconocimientu como una forma de valorar el trabayu infatigable en pro de la cultura y el bien de la vida”, rescampla’l diploma.

Na semeya, un momentu de la inauguración del I Encuentro de Poetas Iberoamericano nel Museo de la Ciudad de México, con García López segunda pela derecha, ente Nozal y l'uruguayu Eduardo Milán.