Noticies curties

Fin de selmana musical: Desakato, Rebolleres Rock y Nueche Celta de Granda

Esta fin de selmana va tar protagonizada pola música yá que, amás de la programación del Festival Intercélticu d'Avilés y del Festival Arcu Atlánticu, ye posible de disfrutar de cites destacaes tanto güei, como mañana y el domingu. Asina, esta nueche Tresona celebra les fiestes de San Pelayo con un eventu dedicáu al rock que tien a Desakato como cabeza de cartelu. Los conciertos, nel que tamién participen Ofensivos y Franklin Soul, principien a les 23.30 hores nel prau asitiáu xunto al centru cultural.

Yá ye posible usar Telegram per web n'asturianu

Una iniciativa de Marcos Costales, desarrollador del buscador de web asturianes Atopa, permite l'usu de Telegram per web en llingua asturiana. Esta aplicación de mensaxería nel intre yá se podía utilizar n'asturianu gracies al trabayu de Softastur, llabor qu'agora amplía Costales de manera individual.

Una web de consulta del archivu históricu de la Universidá d'Uviéu escaez l'asturianu

Esta selmana la Universidá d'Uviéu anunciaba la estrena d'una web pa consulta del archivu históricu de la institución. Esta ferramienta permite usar el castellanu, el gallegu, l'eusquera y el catalán, pero non l'asturianu, lo que provocó les crítiques del Conceyu Universitariu pol Asturianu (CUPA).

Derbi de filiales na Copa Federación

Esta mañana celebróse nel salón de Plenos del Conceyu de Llanes el sortéu de la primer fase de la Copa Federación, que dexó un duelu de filiales al asitiar al Sporting B y al Vetusta nel grupu A xunto col CD Covadonga. El primer derbi va tener llugar na primer xornada, el miércoles 30 en Mareo, mentes que la vuelta n'El Requexón va celebrase'l 10 d'agostu.

PSOE y PP saquen alantre la llei que regula la RTPA y que marxina al asturianu

La Llei del Principaú d’Asturies de Segunda Reestructuración del Sector Públicu Autonómicu, que va regular la RTPA, aprobóse ayeri na Xunta Xeneral colos votos del PSOE, el so promotor, y del PP. El pautu d'estos dos partíos foi criticáu pola oposición, que considera que la fin de la mesma, no que respeuta al ente públicu de comunicación, ye controlar el mediu de cara a les eleiciones próximes nun momentu delicáu pa les dos formaciones.

El XVIII Festival de Bandes de Gaites Villa de Candás enllena de música la población

Dende güei hasta'l domingu va desenvolvese en Carreño'l XVIII Festival de Bandes de Gaites de Candás que va contar cola participación de la Banda de Gaitas Os Blancos (Galicia), la Bagad Elven (Breizh), la Banda Gaites Villaviciosa-El Gaitero, la Banda Gaites Xácara y la Banda Gaites Candás. Como novedaes d'esti añu tán el I Concursu de Pareyes de Gaita y Tambor Villa de Candás y el I Concursu de Cuerpos de Percusión Villa de Candás, previstes pal domingu a les 18 y les 20.15 hores, de manera respeutiva, na plaza'l Bocata.

Una obra de Díaz Trancho protagoniza la coronación del Rei Aurelio

Principien les fiestes de La Laguna, en L'Entregu, y con elles el IX Alcuentru Medieval. El Mercáu Medieval va abrir les puertes a les 18 hores de güei y, dos hores depués, va tener llugar la coronación del Rei Aurelio nel Teatru Municipal de L'Entregu, figura qu'esti añu va tar representada pol cocineru y presentador de TPA Christian González. El grupu de teatru Kumen va representar la obra 'El convidáu real', escrita por Iris Díaz Trancho pa la ocasión.

Los votos del PSOE, Foro y IX valten l'ataque del PP a la materia de Llingua Asturiana

El Plenu de la Xunta Xeneral refugó la moción del Partido Popular (PP) que proponía la inclusión d'una segunda llingua estranxera (francés) y Teunolóxía como materies de llibre configuración que compitieren con Llingua Asturiana y Cultura Asturiana gracies a los votos en contra del PSOE, Foro y IX.

González Peñas va ocupar escañu nel Parllamentu Européu tres la dimisión de Villarejo

L'avilesina Tania González Peñas va convertise nel tercer europarllamentariu asturianu nesta llexislatura. La candidada númberu 6 de la llista de Podemos llega al cargu con antelación con respeuto a lo esperao pola decisión de Carlos Jiménez Villarejo de dimitir por razones personales y familiariaes. Nun primer momentu, anunciara que diba a esperar a defender una direutiva anticorrupción redautada por él mesmu.

D'esta forma, González Peñas acompaña n'Europa a Ángela Vallina (La Izquierda Plural) y Jonás Fernández (PSOE).

La llingua asturiana, nos cursos de branu de Foro

Estos díes ta celebrándose nel IES de Salinas l'Ágora de Foro, cursos de branu de la formación política que trata temes d'economía, derechu, cultura, comunicación, universidá y marketing. Na estaya cultural, dirixida por Cristina Coto, la llingua asturiana va tener el so güecu de la mano d'Alfredo Ignacio Álvarez Menéndez, ex direutor de Política Llingüística, que va dar mañana al meudía la ponencia 'El asturiano, patrimonio inmaterial de Asturias'.

Iglesias Caunedo suspende de funciones a Reinares, que renuncia a dexar el cargu de conceyal

L'alcalde d'Uviéu, Agustín Iglesias Caunedo, decidió suspende a Jaime Reinares nes sos funciones como primer teniente d'alcalde y conceyal de Facienda. La razón ye la condena d'un añu de cárcel y otru d'inhabilitación como candidatu eleutoral y 6.000 euros d'indemnización que recibió l'edil por facer públicos nel 2011 correos electrónicos de la cuenta de Rosa Zapico, ex secretaria xeneral téunica de la Sindicatura de Cuentes. Pese a too, Reinares descarta dimitir como conceyal.

El luxemburgués Juncker, presidente de la Comisión Europea

El Plenu de la Eurocámara escoyó esta mañana al sustitutu del portugués José Manuel Durao Barroso como presidente de la Comisión Europea: ye'l conservador Jean-Claude Juncker tres recibir 422 votos a favor, 250 en contra y 47 astenciones. El luxemburgués tuvo l'apoyu de PP européu, los lliberales y parte de los socialistes –el PSOE finalmente votó en contra–.
 

Tejedor, Corquiéu y N'Arba, cartelu de lluxu pal Llaciniegu

Mañana va celebrase la Romería de Llacín en Porrúa, xornada festiva que va zarrase a les 23 hores cola Nueche Folk. Nesta ocasión, la folixa qu'entama l'Asociación Cultural Llacín y el Muséu Etnográficu del Oriente va contar con un cartelu de lluxu formáu por Tejedor, Corquiéu y N'Arba. Enantes, a les 19 hores, va tocar La Bandina Llacín, pa darréu siguir cola actuación folk de los alumnos de la Escuela Llacín (20 hores) y de la Banda Gaites Llacín (21 hores). Otra manera, l'actividá del Llaciniegu va dar entamu al meudía con actividaes pa neños y neñes.

Rozadas llucha por salvar 'El Carbayón'

Los vecinos de Rozadas, nel conceyu de Bual, quieren salvar 'El Carbayón', nome que recibe un pládanu de más de 300 años del pueblu. Una propietaria de parte del terrén u s'asitia quier valtialu pa dexar pasu a maquinaria pa una obra, pero recibe'l refugu del restu d'habitantes de Rozadas. Dada la situación, l'asociación Amigos del Texu entamó una campaña pa salvar 'El Carbayón' al traviés de Change.org que suma más de 3.600 firmes.

Un bloque soberanista va participar na marcha contra'l paru del xueves en Xixón

L'Espaciu La Llegra entama un bloque soberanista pa la marcha convocada mañana en Xixón 'Escontra'l paru y la esplotación llaboral' por 'Asturies en Pie!', plataforma formada por CSI, CGT, CNT-Xixón, SUATEA, FUSOA, CSA La Semiente, Par@os y Precari@s d'Asturies, Centru Social Sestaferia y l'Asociación Picu Rabicu.
 

Barreiro lleva a la 'Semana Negra' el so llibru 'L'espeyu onde miranos'

De la mano de l'Asociación Cultural L'Arribada, Damián Barreiro va presentar na 'Semana Negra' el so trabayu 'L'espeyu onde miranos: televisiones de proximidá n'Europa Occidental y procesos de recuperación identitaria', VI Premiu d'Ensayu y Trabayos d'Investigación Fierro Botas. L'actu va celebrase mañana, a les 17 hores, na 'Carpa del Encuentro', onde'l periodista va tar acompañáu pol escritor Humberto Gonzali y por Esther Prieto, copropietaria d'Ediciones Trabe.

Darréu recuerda que "ensin mocedá, nun hai futuru"

Los datos demográficos d'Asturies, con una perda de 8.000 habitantes según los datos del INE, esmolez al coleutivu mozu Darréu, que culpa de la situación al "paru, precariedá y emigración" qu'atopa la xuventú asturiano.

Tejedor, La Tarrancha y Degañan's, na Nueche Folk de Fitoria

La Nueche Folk de Fitoria llega a la so decimocuarta edición con un cartelu conformáu por Tejedor, La Tarrancha y Degañan's. Esta folixa de la población uviedina va principiar a les 22 hores d'esta nueche y sirve d'aniciu a les fiestes de San Antonio, que s'allarguen hasta'l llunes.

La cultura sidrera y la misa de gaita asturiana yá son Bienes d'Interés Cultural

El Conseyu de Gobiernu aconceyáu ayeri aprobó la calificación de la cultura sidrera y de la misa de gaita como Bienes d'Interes Cultural (BIC). Nel casu concretu de la bébora tradicional del país, esta decisión ye un pasu necesariu nel oxetivu d'algamar la categoría de Patrimoniu Inmaterial de la Humanidá que persigue'l Gobiernu y el sector sidreru. Tamién foi declaráu BIC el castru de Mouguías, en Cuaña.

El PAS critica la postura del PP con respeuto a la materia de Llingua Asturiana en Primaria

El Partíu Asturianista (PAS) cargó nun comunicáu contra "la campaña del PP contra la presencia del asturianu nos primeros niveles de la enseñanza", lo que pa la formación ye "una amuesa más del so señoritismu, madrilanismu y de la so actitú permanentemente contraria a la cultura y la identidá asturiana". D'igual forma, llamenta que "namái nuna ocasión, la del Gobiernu de Marqués", éstes "alcontraren comprensión" dientro del PP.

Efrén d'Andrés

Última viñeta (25 de mayu del 2024)

Espaciu y Tiempu

Xuegos

Enigma Xovellanos
Conoces Asturies
 
Sopa de lletres
Sopa de lletres
Conceyos d'Asturies
Conceyos d'Asturies